Qazaqstan Respýblikasynyń Memlekettik hatshysy Qyrymbek Kósherbaevtyń tóraǵalyǵymen «Rýhani jańǵyrý» baǵdarlamasy boiynsha ótken komissiia otyrysynda Aqparat jáne qoǵamdyq damý ministri Dáýren Abaev baǵdarlamanyń 2020 jylǵa arnalǵan jańa josparyn tanystyrdy, dep habarlaidy QazAqparat.
«Óńirlerde jobalardy sapasyz josparlaý problemasy bar. Nátijesinde bastapqyda qoiylǵan maqsat kútken nátijege sai kelmei qalǵan tustar kezdesti. 2020 jylǵa arnalǵan jańa jospar atalǵan problemalardy eskere otyryp jasaldy. Memlekettik hatshymen bekitilgen ol 122 bólimnen turady», - dedi Dáýren Abaev.
Ministr óz sózinde jańa josparda kóptegen sharanyń qysqartylǵanyn jetkizdi.
«Bólimderdiń sanyn eki ese qysqarttyq. Sapa kóteriler degen senimdemiz. Jospar negizgi úsh baǵytta júzege asyrýdy kózdeidi. Birinshisi – jeke damý. Ekinshisi – ulttyq biregeilik pen halyqaralyq tanystyrylym. Úshinshisi – memlekettiń, azamattyq qoǵam men jergilikti qoǵamdastyqtardyń damýy. Buǵan deiin aitqanymdai, biyl qujat boiynsha sharalar legi eki ese qysqardy. Osy sharalardyń úshten biri ǵana forýmdar men festivaldardan, saiystar men konferentsiialardan turady», - dedi Dáýren Abaev.
Aqparat jáne qoǵamdyq damý ministri «Rýhani jańǵyrý» baǵdarlamasynyń brend-býgyn daiyndaý boiynsha jumystardyń bastalyp ketkenin málim etti.
Eske sala ketsek, búgin Aqordada QR Prezidenti janyndaǵy Qoǵamdyq sanany jańǵyrtý baǵdarlamasyn iske asyrý jónindegi Ulttyq komissiianyń otyrysy ótken bolatyn.
.jpeg)