Qazaqstan Prezidenti Nursultan Nazarbaev Resei Federatsiiasy Úkimeti tóraǵasynyń orynbasary Dmitrii Rogozinmen kezdesti, dep habarlaidy "Ult aqparat" Aqordaǵa silteme jasap.
Kezdesýde Baiqońyr ǵarysh ailaǵyn odan ári damytý, sondai-aq qorǵanys jáne qarý-jaraq máseleleri jóninde Qazaqstan men Resei úkimetteri júrgizip jatqan jumystar barysy qarastyryldy.
– Biz qorǵanys ónerkásibi salasynda birlesken kásiporyndar qurý máselesin buǵan deiin de talqyladyq. Osy maqsatpen bizdiń elde jeke ministrlik quryldy, – dedi Nursultan Nazarbaev.
Memleket basshysyna Resei Úkimetiniń vitse-premeri bolashaqta birlese júzege asyrylatyn «Báiterek» jobasynyń tehnikalyq jaǵy týraly egjei-tegjeili baiandap berdi.
– Bul joba múlde jańa zymyran-ǵarysh tehnikasyn jasaýǵa jáne zymyran jóneltý keshenin jańǵyrtýǵa baǵyttalǵan. Joba jóninde qol jetkizilgen ýaǵdalastyqtar eki el basshylary tarapynan resmi rásimdelgen jaǵdaida Baiqońyr qalasy men jóneltý keshenin damytýdyń jarqyn perspektivasyna jol ashylady, – dedi D.Rogozin.
Sondai-aq, Memleket basshysy Qazaqstan men Resei qarym-qatynasynda ekonomikanyń basqa salalary boiynsha da ilgerileýshilikter bar ekenin atap ótti.
