Aqmola oblysynyń eki sportshysy streetlifting boiynsha Eýropa chempiony atandy. Jerlesterimiz eki altyn, bir kúmis jáne eki qola medal ielendi, dep habarlaidy oblystyq dene shynyqtyrý jáne sport basqarmasy.
Vedomstvonyń málimetinshe, Máskeý qalasynda stritliftingten (streetlifting) Eýropa chempionaty ótti. Bairaqty jarysqa Qazaqstan, Resei, Belarýs, Ýkraina, Chehiia, Estoniia, Aljir, Belgiia, Italiia, Polsha jáne Ulybritaniia elderinen barlyǵy 200-ge jýyq sportshy qatysyp baq synady. Onyń ishinde Qazaqstan quramasy atynan barǵan jeti sportshynyń ekeýi Aqmola oblysynan.
«Jarys qorytyndysy boiynsha ulttyq qurama jalpy komandalyq esepte 30 medalmen (onyń ishinde 25 altyn, 2 kúmis jáne 3 qola medal) birinshi oryn aldy. Jerlesimiz Imran Ibragimov qos syryqta syǵymdaý jáne beltemirge tartylý boiynsha jalpy 175 keli esebimen birinshi oryn aldy. Budan bólek, ol halyqaralyq dárejedegi sport sheberi normativin oryndady.
Sonymen qatar Damir Ábdirahmanov ta qossyryqta syǵymdaý jáne beltemirge tartylý boiynsha jalpy 150 keli esebimen birinshi oryn aldy. Ol da sport sheberi normativin oryndady», - deidi Aqmola oblystyq dene shynyqtyrý jáne sport basqarmasynyń baspasóz hatshysy Mahabbat Bolshina.
Vedomstvodan atap ótkendei, aimaq basshysy Ermek Marjyqpaev Eýropa chempionatynyń jeńimpazy Imran Ibragimov jáne Damir Abdrahmanovpen kezdesip, sportshylardy quttyqtady.
