Aqmola oblysynyń Qylmystyq ister jónindegi mamandandyrylǵan aýdanaralyq sottynda taksi júrgizýshisine qaraqshylyq shabýyl jasap, óltirip jáne kóligin iemdengen (Qylmystyq kodekstiń 192 babynyń 2 bóligi 1 tarmaǵy, 200 babynyń 2 bóligi 1 tarmaǵy, 9 babynyń 2 bóligi 3,7,10 tarmaqtary) Býrabai aýdanynyń eki turǵynyna qatysty sot úkimi shyqty, dep habarlaidy QazAqparat tilshisi oblystyq sottyń baspasóz qyzmetine silteme jasap.
Sot úkimimen sottalýshylardyń árqaisy qaýipsizdigi barynsha joǵary qylmystyq-atqarý júiesi mekemelerinde jazasyn ótei otyryp, 18 jylǵa bas bostandyǵynan aiyryldy.
Sondai-aq olarǵa alkogolizmnen májbúrlep emdeý túrindegi jaza taǵaiyndaldy.
Sot jábirlenýshilerdiń sottalǵandar R. jáne G-ǵa materialdyq zalaldy jáne moraldyq ziiandy óteý týraly azamattyq talap-aryzyn qanaǵattandyryp, zardap shekken taraptyń paidasyna sottalǵandardan ortaq tártippen 10 000 000 teńge óndirip aldy.
«Aqmola oblysy Býrabai aýdanynyń turǵyndary, jumys istemeitin 22 jastaǵy R. men kolledjdiń 21 jastaǵy stýdenti G. biylǵy mamyr aiynda mas kúiinde taksi júrgizýshisine qaraqshylyq shabýyl jasap, odan aqsha urlaý maqsatynda onyń uialy telefonyn, avtokóligin iemdenip, óz qylmysyn jasyrý maqsatynda taksi júrgizýshisin óltirgen. Júrgizýshini krossovkanyń baýymen tunshyqtyryp, moiny men keýdesin synǵan shyny bótelkeniń ótkir jiekterimen soqqan. Sodan keiin kúdiktiler kólikti bos jerge tastap, qylmys ornynan qashyp ketti», - dedi vedomstvodan.
