Táýelsizdik merekesine orai Aqmola oblysynda birqatar óndiris oryndary jáne turǵyn úi paidalanýǵa berildi, dep habarlaidy "Ult aqparat" oblystyq ishki saiasat basqarmasyna silteme jasap.
Máselen, Aqkól aýdanynyń Qarasai aýyldyq okrýgynda «Akkol beef» jaýapkershiligi shekteýli seriktestigi ashyldy. Bul jobanyń jalpy quny - 320 million teńge. Et óndirý baǵytynda qazaqtyń aqbas siyryn ósirýdi qolǵa alǵan kásiporynnyń jobalyq qýaty jylyna 100 bas iri qarany quraidy. Bastapqyda munda 5 adam eńbek etse, tolyq qýatyna shyqqan kezde jumysshy sanyn 10-ǵa deiin jetkizý josparda bar.
Jańa nysannyń ashylýyna Aqkól aýdanynyń ákimi Alpysbai Qaiyrjanov qatysyp, quttyqtaý sóz sóiledi.
«Mundai fermalar aýyldaǵy jańa jumys oryndary, kepildi jalaqy men salyq, eń bastysy - aýyl ómiriniń gúldenýine septigin tigizedi. Munda mal sharýashylyǵyn damytýǵa qolaily jańa tehnologiialar men jabdyqtar qoiylǵan. Bul aýdanymyz jáne tutas elimizdiń ekonomikasyna zor úlesin qosady. Memlekettiń qoldaýynyń arqasynda zamanaýi óndiris oryndary ashylýda. Barshańyzdy elimizdiń eń basty meiramy – Táýelsizdik kúnimen jáne aýdanymyzdaǵy jańa aýyl sharýashylyq nysanynyń ashylýymen shyn júrekten quttyqtaimyn. Et óndirisi joǵary sapada ári básekege qabiletti bolýyn tileimin», - dedi aýdan ákimi.
Nysannyń ashylý saltanatynan keiin sharaǵa qatysýshylar et baǵytyndaǵy fermany aralap, jumysymen tanysty.
Táýelsizdik merekesi Shýchinsk qalasynyń bes otbasy úshin qos birdei merekege ainaldy. Býrabai aýdanynyń ákimi Áset Muzdybaev mádeniet úiinde kópbalaly otbasylarǵa óz qolymen kópten kútken páter kiltin tabys etti.
«Jańa qonys ielerin kópten kútken qýanysh – baspanaǵa qol jetkizýimen quttyqtaimyn. Ár otbasynda bereke men birlik bolsyn», – dedi aýdan ákimi Áset Muzdybaev.
Al, Birjan sal aýdany Stepniak qalasynyń turǵyny Anastasiia Táýkelova «Eńbek» memlekettik baǵdarlamasy sheńberinde «Jas kásipker» jobasy boiynsha «Eco cleaning» ekologiialyq quraldarymen jumsaq jihazdar men kilemderdi himiialyq tazartý ornyn ashty. Ol «Táýkelova» jeke kásipkerliginiń ashylýyna atalmysh baǵdarlama boiynsha 505 000 teńge somasyna grant aldy. Jańa óndiris ornynda kilemder, jumsaq jihazdar himiialyq tazartýdan ótkiledi, sondai-aq, kiim jýý boiynsha qyzmet kórsetiledi.
Budan bólek, aýdan ákimi Ermek Nuǵymanovtyń qatysýymen kópbalaly otbasylarǵa úsh páterli turǵyn úidiń kiltteri tapsyryldy. Laýra Nuǵmanova, Klavdiia Sakýr jáne Nina Zykovalardyń otbasy kópten kútken baspanaǵa ie boldy.
«Bizdiń birinshi kezektegi mindetimiz - halyqty áleýmettik qoldaý. Muqtaj adamdarǵa turǵyn úi berý - biz úshin úlken qýanysh. Qolǵa alynǵan baǵdarlamalar búginde sátti júzege asyrylýda. Sonymen qatar tiisti mekemelerge kelip, bilikti qyzmetkerlerdiń qataryn tolyqtyrǵan bilim jáne densaýlyq saqtaý salasynyń mamandary men kezektegi azamattar úshin 21 páterli turǵyn úidiń qurylysy bastaldy. Munyń bári bizdiń azamattardyń ál-aýqatyn jaqsartýǵa baǵyttalyp otyr», – dedi Ermek Bekenuly.
