Sinoptikter 25 sáýir - 1 mamyr aralyǵyndaǵy aptalyq gidrologiialyq boljamyn jariialady. Boljamǵa sáikes Aqmola, Soltústik Qazaqstan jáne Shyǵys Qazaqstan oblystarynda sý tasqyny kezeńi mamyr aiynyń birinshi onkúndigine deiin jalǵasady, dep habarlaidy "Ult aqparat" Qazgidrometke silteme jasap.
2020 jylǵy 17-23 sáýir aralyǵynda Qazaqstan aýmaǵynyń qar jamyl,ysy alańy qysqardy jáne ol barlyq aýmaqtyń 2 paiyzynda qalǵan. Bul NASA spýtnikteriniń jerdi qashyqtyqtan zondtaý barysynda túsirgen ári «Qazgidromet» óńdegen sýretterden kórinedi.
«Batys Qazaqstan, Aqtóbe, Atyraý, Qostanai jáne Qaraǵandy oblystarynda ózenderde sý deńgeiinde azdap aýytqý bolýy yqtimal, biraq kóktemgi sý tasqynynyń biik shegi ótti.
Jambyl, Túrkistan, Shyǵys Qazaqstan jáne Almaty oblystarynda jazyq jáne taý bókterindegi aýmaqtarda qar jamylǵysy tolyǵymen eridi. Odan ári jaǵdai jaýyn-shashynnyń temperatýralyq rejimine jáne qatty nóserdiń jaýýyna orta taýdaǵy (2 000 m deiin) jáne biik taýdaǵy (2000 metrden joǵary) qardyń erý qarqynyna bailanysty bolady», delingen habarlamada.
Aqmola, Soltústik Qazaqstan jáne Shyǵys Qazaqstan oblystarynda sý tasqyny kezeńi mamyr aiynyń birinshi onkúndigine deiin jalǵasady.
«Apta boiy aýa raiy qubylmaly bolady, naizaǵaily jańbyr jaýady, ekpindi jel soǵady. Soltústik óńirlerde jańbyr arty qarǵa ulasýy múmkin. Elimizdiń soltústik-batysynda jáne ońtústiginde qatty nóser jaýyp, túngi temperatýra minýsqa deiin tómendeýi boljandy. Osyǵan bailanysty Túrkistan, Jambyl jáne Almaty oblystarynyń ózenderinde sý deńgeiiniń kóterilýi boljanýda», delingen habarlamada.
Spýtinik túsirgen sýretterge sáikes Shyǵys Qazaqstan oblysynyń taý ózenderinde qar jamylǵysy 8 paiyz shamasynda. Sinoptikalyq boljam negizinde aldaǵy aptada oblysta jaýyn-shashyn túsedi, sondai-aq orta taýlardaǵy qar jamylǵysy eritindikten, atalmysh ózenderdiń sýynyń artýy kútiledi.
