Aqmola oblysyndaǵy demalys aimaqtarynyń kireberisine 10 blokpost ornatylyp, kólik qozǵalysyna shekteý qoiylady, dep habarlaidy "Ult aqparat" oblystyq ishki saiasat basqarmasyna silteme jasap.
Buryn habarlanǵandai, kólder janyndaǵy demalys oryndaryna adamdardyń kóp jinalýyna, koronavirýs juqtyrýdyń jiilep ketýine jáne demalýshylar arasynda azamattyq jaýapkershiliktiń tómendigine bailanysty 24 shildede saǵat 00.00-den bastap Aqmola oblysynyń kýrort aimaqtary týrister úshin jabylady.
Býrabai men Zerendi elordaǵa jaqyn ornalasqan sanatorlyq-kýrorttyq oryndar retinde demalýshylardy lokdaýn aiaqtalǵansha qabyldamaidy.
Budan basqa, elorda mańyndaǵy Arshaly, Tselinograd, Shortandy, Aqkól jáne Ereimentaý aýdandarynyń sý qoimalarynda da demalýǵa bolmaidy.
«Qonaqúilerdegi jaldamaly jaǵajai, haýyz, bassein qyzmetine tyiym salynady. Sý qoimalarynyń jaǵasynda ornalasqan oiyn-saýyq jáne saýda oryndary, qaiyq stansalarynyń qyzmeti toqtatylady. Qonaqúi ielerine brondaý úshin ótinim qabyldaýǵa tyiym salynǵan. Osy sharalardyń barlyǵy infektsiia juqtyrý ósimin tómendetýge baǵyttalǵan. Bul jaǵdaiǵa túsinistikpen qarap, demalys aimaqtaryna sapar jasaýǵa, adamdar kóp jinalatyn jerlerge barýdan bas tartýdy suraimyz», - dep atap ótti oblystyq COVID–19 baspasóz ortalyǵynan.
Eske sala ketsek, týrizm basqarmasy, aýdan jáne aýyl ákimdikteri, politsiia jáne basqa da múddeli organ qyzmetkerleri quramyna kirgen mobildi monitoring toptary Býrabai, Zerendi jáne Ereimentaý aýdandarynyń kólderinde oblystyń bas sanitarlyq dárigeriniń qaýlysyn saqtaý boiynsha reid, tártip buzýshylardy ákimshilik jazaǵa tartý jumysyn kún saiyn ótkizip otyr. Biyl jazda talapty oryndaǵaman azamattarǵa 500-ge jýyq aiyppul salynǵan.
