Foto: TJM
Aqmola oblysy Astrahan aýdanynda Qalqutan ózeni tasydy. Saldarynan Kolýton aýylyn sý basqan, dep habarlaidy Ult.kz.
Qarǵyn sý kóshege jaiylǵanymen, turǵyn úilerdiń ishine kirmegen. Qazir 1 000-nan astam qap tóselip, 300 tekshe metr sý soryldy.
Aýyldan 21 adam evakýatsiialandy. 100-den asa iri qara men usaq mal qaýipsiz jerge aidaldy.
Sý tasqynyna qarsy is-sharalardy kúsheitý sheńberinde TJM 28237 áskeri bóliminen áskeri qyzmetshiler toby keldi. Áskeri qyzmetshiler yqtimal sý basý aimaǵynda qorǵanys qurylystaryn nyǵaitý jumystaryn jedel oryndaýǵa kiristi. Qazirgi ýaqytta jaýyngerler qapshyqtardy inertti materialmen toltyrýdy aiaqtady jáne olardy táýekel aimaǵyna kiretin aýla aýmaqtarynda tóseidi. Jumystar táýlik boiy júrgiziledi.
TJM qosymsha kúshterin tartý sý tasqyny saldaryn azaitýǵa jáne aýyl halqy men infraqurylymyn qorǵaýǵa baǵyttalǵan.
Sondai-aq Jaqsy aýdanyndaǵy «Astana-Atbasar-Jaqsy-Rýzaevka-Sarykól-Qostanai» tasjolyn sý shaiyp ketti. Eskertýdi elemei ótken kólikti tasqyn sý jol jiegine aǵyzyp áketip, kólik júrgizýshisi qaitys boldy.
