Kókshetaý qalasynda júkti áieldiń múgedek bolyp qalýyna kináli akýsher-ginekolog dárigerlerge úkim shyqty. Alaida, merzimniń ótýine bailanysty dárigerler qylmystyq jazadan qutylyp, zalaldy ǵana óteitin boldy, dep habarlaidy "Ult aqparat".
Kókshetaý qalalyq sotynyń málimetinshe, Aqmola oblystyq kópbeiindi aýrýhanasy perinataldyq ortalyǵynyń eki akýsher-ginekolog dárigerine qatysty qylmystyq is qaraldy.
«Sot 2019 jyldyń 8 mamyrynda Kókshetaý qalasyndaǵy perzenthana bólimshesine túsken jábirlenýshini eki kezekshi dáriger qaraǵanyn anyqtady. Olar óz tekserý nátijeleri boiynsha basqa dáriger júrgizgen aldyńǵy tekserýdiń derekterin, sondai-aq áieldiń anamneziniń nátijelerin nazarǵa almai, qylmystyq nemqurailylyq tanyta otyryp, óz is-áreketterinen qoǵamdyq qaýipti saldar týyndaýy múmkindigin aldyn ala boljamai, uryqtyń uryq qabyǵynyń naqty jai-kúiin tolyq baǵalamai, óz ókilettikteriniń sheńberinen shyǵyp, buryn qoiylǵan diagnozdy negizsiz alyp tastaǵan. Abaisyzdyq pen meditsinalyq kómek kórsetýde jiberilgen qatelikterge bailanysty jábirlenýshi I top múgedektigin aldy», - dep atap ótti qalalyq sotta.
Sot otyrysynda prokýror sottalýshylardy kináli dep tanýdy jáne eskirý merziminiń ótýine bailanysty olardy qylmystyq jaýaptylyqtan bosatýdy surady. Jábirlenýshi tarap eń qatań jaza taǵaiyndaýdy surady. Al sottalýshylardyń ózderi kinásin moiyndamady.
Kókshetaý qalalyq sotynyń úkimimen eki akýsher-ginekolog QR QK 317-babynyń 2-bóliginde kózdelgen «meditsina qyzmetkeriniń abaisyzda jáne teris piǵyldy kózqarasy saldarynan densaýlyqqa aýyr ziian keltirýge ákep soqqan kásibi mindetterin tiisinshe oryndamaýy» qylmystyq quqyq buzýshylyq jasaǵany úshin kináli dep tanyldy.
«Qylmys jasalǵan kúnnen bastap eki jyldan astam ýaqyt ótti. QK-niń 71-babyna sáikes adam, eger qylmystyq quqyq buzýshylyq jasalǵan kúnnen bastap onsha aýyr emes qylmys jasalǵannan keiin 2 jyl ótse, qylmystyq jaýaptylyqtan bosatylady. Sottalýshylardy qylmystyq jaýapkershilikke tartý merziminiń ótip ketýine bailanysty olar qylmys jasaǵany úshin kináli dep tanylyp, jazadan bosatyldy», - dep tolyqtyrdy qalalyq sot.
Jábirlenýshi taraptyń azamattyq talaptary ishinara qanaǵattandyryldy. Aqmola kópsalaly oblystyq aýrýhanasynan keltirilgen materialdyq zalal 3 928 168 teńge jáne moraldyq ziian 15 000 000 teńge óndirildi. Sondai-aq, sottalǵandardan ókildiń kómegine aqy tóleý boiynsha 1 500 000 teńge mólsherinde shyǵystar óndirip alyndy.
Úkim zańdy kúshine engen joq.
Sonymen qatar, sot is boiynsha tergeý barysynda áýre-sarsańǵa jol bergeni úshin prokýratýra men politsiia organyna, al dárigerlerdiń jumysynda anyqtalǵan buzýshylyqtar úshin Densaýlyq saqtaý basqarmasynyń atyna jeke qaýlylar shyǵardy.
