«QazAvtoJol» UK« AQ Aqmola oblysynda ótken qoǵamdyq tyńdaýda óńirdegi avtojoldar qashan aqyly bolatynyn málim etti, dep habarlaidy "Ult aqparat".
Aqmola óńiri arqyly respýblikalyq mańyzy bar 4 avtomobil joly ótedi. Olardyń ekeýi – Nur-Sultan-Shýchinsk jáne Nur-Sultan-Qaraǵandy ýchaskesi burynnan aqyly.
Biyl Aqmola oblysyndaǵy qalǵan 2 trassada – Nur-Sultan-Pavlodar jáne Nur-Sultan-Qostanai ýchaskesinde aqy alýdyń ashyq júiesi engiziletin bolady. Elordadan elimizdiń shyǵysyna qarai shyǵatyn júrdek jol tórt jolaqty bolsa, M-36 jolynyń Qostanaiǵa deiingi jalǵasy eki jolaqty bolyp qala beredi. Bul – kólik qozǵalysynyń qarqyndylyǵyna bailanysty. Memlekettik standart boiynsha kópjolaqty tasjol táýligine 7 myńnan astam avtokólikten asqan kezde ǵana salynady, Qostanaiǵa aparatyn kúre joldaǵy kólik ilegi ázirshe 5 myńnan tómen.
Nur-Sultan-Pavlodar tasjolynyń uzyndyǵy – 396 km. Aqyly avtojol ýchaskesi Pavlodar, Ekibastuz, Aqsý qalalary men Ereimentaý aýdany arqyly ótedi. Munda 7 baqylaý arkasy ornatylǵan. Jol 1 tehnikalyq sanatqa jatatyndyqtan, ondaǵy ruqsat etilgen qozǵalys jyldamdyǵy saǵatyna 140 km quraidy.
Nur-Sultan-Qostanai jolynyń uzyndyǵy – 650 km. Atalmysh aqyly ýchaskede 9 arka ornatylyp, olar osy kóktemde testilik rejimde jumys istei bastaidy. Aita ketsek, bul jolda jeńil avtokólik ieleri jol júrý aqysyn tólemeidi, óitkeni ýchaske 2 jáne 3 sanattaǵy joldar.
Qoǵamdyq tyńdaýlar barysynda jergilikti turǵyndardan «Balama joldar qarastyrylǵan ba?» degen suraq jii qoiyldy. «QazAvtoJol» ókilderi: «Keibir óńirlerde aqyly baǵyttarmen qatar tegin marshrýttar bar, alaida Qazaqstanda jańa balama joldar salynbaidy. Sebebi «Avtomobil joldary týraly« zańda mundai mindettemeler qarastyrylmaǵan», - dep atap ótti.
Basqa óńirlerdegidei Aqmola oblysynyń turǵyndary «QazAvtoJol» UK« AQ-ǵa aqyly trassalarda jaryq ornatý, jol boiyndaǵy qorshaýlardy jaqsartý, jol ústine tosqaýyldardy ornatý, sapaly qar ustaityn jáne trassalarda qardy ýaqytyly tazalaý týraly talaptaryn qoidy. Sonymen qatar, aýyl sharýashylyǵy tehnikasyn, kommýnaldyq qyzmet kólikterin jáne jergilikti kásipkerlerdi jolaqy tóleýden bosatý usynyldy.
Turǵyndar tarapynan tyń ideialar da aityldy: aqyly jol ótetin árbir eldi mekende apattyq nemese qaýipti jaǵdailar týraly eskertý úshin ár 20-30 km saiyn elektrondy tablo qoiý, jyly aialdamalar men jerústi jaiaý júrginshiler ótkelderin ornatý, aqyly ýchaskelerge qyzmet kórsetýdi básekeles ortaǵa berý, Semei iadrolyq poligonynan zardap shekken azmattardy, kópbalaly analardy tólem tóleýden bosatý.
Aita keteiik, 2021 jyly memleket 5,8 myń km jolda aqyly jol engizýdi josparlap otyr. Negizgi maqsat – qaýipsizdikti arttyrý jáne respýblikalyq avtojoldardy kútip-ustaýǵa arnalǵan biýdjet shyǵystaryn qysqartý.
