Búgin tańǵy saǵat 05:19-da Aqmola oblysy Atbasar aýdany Hriashevka aýylynda jeke turǵyn úide 100 sharshy metr alańda órt boldy, dep habarlaidy "Ult aqparat" oblystyq TJD baspasóz qyzmetine silteme jasap.
«Úide 1979 jáne 1981 jylǵy ata-ana men olardyń 2004, 2005, 2007, 2008 jyly týǵan uldary men 2012 jyly týǵan qyzynan, jeti adamnan, turatyn kópbalaly otbasy turǵan. Atbasardaǵy №4 mamandandyrylǵan órt sóndirý stantsiiasyna deiingi qashyqtyq 25 shaqyrym. Órt sóndirý bólimsheleri kelgenge deiin, otaǵasy 2004 jáne 2012 jyly týylǵan eki balany jáne onyń áielin aman qutqaryp qalǵan», - dep atap ótti baspasóz qyzmeti.
TJD málimeti boiynsha órt saldarynan úidiń tóbe jabyndysy qulaǵan.
«Saǵat 06: 40-ta órt aýyzdyqtalyp, saǵat 08:25-te sóndirildi. Órt shyqqan orynnan úsh balanyń denesi tabyldy», - dep habarlady TJD.
Órtti sóndirýge TJD-nyń12 qyzmetkeri men 2 tehnikasy, erikti órt sóndirý quralymdary -3 tehnika jáne úsh adam jumyldyryldy.
Oqiǵa ornynda aýdandyq politsiia bóliminiń jedel-tergeý tobynyń kezekshisi jumys isteidi.
«Otaǵasynyń aitýynsha, tańerteńgi saǵat bes shamasynda uly ony oiatyp, veranda órtenip jatqanyn aitqan. Er adam úidiń terezesin syndyryp, áieli men eki balasyn shyǵaryp alǵan. Órt tez taraǵan, óitkeni úi tez tutanatyn materialdardan salynǵan. Úsh balany qutqarý múmkin bolmady. Órttiń sebebi anyqtalýda, Kókshetaý qalasynan órt synamasy zerthanasyna jiberildi», - dedi Aqmola TJD basshysynyń mindetin atqarýshy Qanat Dospaev.
