Foto: Polisia.kz
Aqmolalyq politseiler quny 30 mln teńge bolatyn joǵalǵan 103 jylqyny ielerine qaitaryp berdi, – dep habarlaidy "Ult aqparat" Polisia.kz portalyna silteme jasap.
Sandyqtaý aýdany, Jylandy aýylynyń birneshe turǵynyna tiesili jylqy tabynynyń joǵalǵany týraly aryz politsiia bólimine 12 jeltoqsanda túsken. Ieleriniń aitýynsha, jaiylymda júrgen 103 jylqy 5 jeltoqsanda joǵalyp ketken. Aýyl turǵyndary olardy bir apta boiy ózderi izdep, sodan keiin ǵana politsiiadan kómek suraǵan. Aqmolalyqtar shyǵyndy 30 mln teńgege baǵalady.
"Jábirlenýshilerdiń ótinishi tirkeldi. Asa iri zalal eskerile otyryp, bul derekke qatysty QR QK-niń 188-baby 4-bóligi (Asa iri mólsherde jasalǵan urlyq) boiynsha sotqa deiingi tergeý bastaldy.
Joǵalǵan jylqylardy izdeý úshin politseiler jedel sharalar qabyldady, kriminaldyq politsiia qyzmetkerleri men jergilikti politsiia qyzmeti bólimsheleriniń arasynan arnaiy toptar quryldy. Izdeý is-sharalaryna TJ qyzmetkerleri men ieleriniń ózderi qatysty. Túrli avtomobil tehnikasy paidalanyldy, sondai-aq politsiia departamentiniń dronymen da izdeý júrgizildi.
Bul kúnderi óńir aýmaǵynda qatty aiaz boldy. Aýa-raiynyń qolaisyzdyǵyna qaramastan, toptar táýlik boiy tek Sandyqtaý aýdanynyń aýmaǵynda ǵana emes, oblystyń kórshi aýdandarynda da izdeý is-sharalaryn júzege asyrdy.
Sondai-aq politseiler jedel is-sharalar keshenin ótkizdi: mal basy men et ónimderin satýmen ainalysatyn adamdardy tekserdi, et bazarlary, et kombinattary jáne basqa da saýda oryndary nazardan tys qalmady. Avtojoldarda qosymsha blokbeketter qoiyldy, patrýldik politsiia batalonynyń qyzmetkerleri mal men et ónimderin tasymaldaýmen ainalysatyn avtokólikterge tekserý júrgizdi" - delingen habarlamada.
Qabyldanǵan sharalardyń nátijesinde 14 jeltoqsanda jylqylardyń barlyǵy joǵalǵan tustan 30 shaqyrym jerde tabylyp, ielerine qaitarylǵan. Belgili bolǵandai, urlyq faktisi rastalmaǵan, osyǵan bailanysty qylmystyq isti tergeý toqtatylǵan.
