Aqmola oblysynyń Ishki saiasat basqarmasy Aqmola oblysynda Qazaqstan halqy tilderi kúni aiasynda ótkizilip otyrǵan onkúndik ashylǵanyn jariialady.
Ishki saiasat basqarmasynyń basshysy Ǵalym Shoikin Óńirlik kommýnikatsiialar qyzmetiniń media-ortalyǵynda ótkizilgen brifingte onkúndik aiasynda qandai sharalar ótkiziletini týraly aityp berdi.
«Qazaqstan Respýblikasy halqynyń tilderi kúnine arnalǵan dástúrli onkúndik 2019 jylǵy qyrkúiektiń 5-i men 20-sy kúnderi aralyǵynda ótedi, onkúndik aiasynda oblysta 300-den astam is-shara ótkizý josparlanýda. Búgin óńirdegi barlyq mekemeler men uiymdarda Tilder kúni onkúndiginiń ashylýy ótti. Negizgi leitmotivi – memlekettik til saiasatyn iske asyrý salasyndaǵy jetistikterdi kórsetý» - dep atap ótti Ǵalym Shoikin.
Aǵymdaǵy jyly tilder onkúndigin ótkizý maqsatynda oblystyń barlyq mekemeleri men uiymdarynda tilder dekadasynyń ashylýy, taqyryptyq jáne mádeni-buqaralyq sharalar ótkizý qarastyrylǵan oblystyq Is-sharalar jospary bekitilgen.
Etnos aralyq kelisim men birlikti nyǵaitatyn is-sharalar, til bilý konkýrstary, poeziia keshteri, Qazaqstan Respýblikasy aýmaǵynda turatyn barlyq etnostardyń mádenieti, tarihy jóninde maǵlumat beretin dóńgelek ústelder men ǵylymi konferentsiialar uiymdastyrylady.
Ótkiziletin is-sharalardyń kópshiliginiń kórermenderi - óskeleń urpaq. «Qazaq tilim – máńgi jasar bailyǵym» forýmy, «Tekti sózdiń tóresi – terme» konkýrsy, «Tildaryn» olimpiadasy jastardyń qatysýymen ótedi.
Biylǵy jyly ótkiziletin onkúndiktiń jańalyǵy – belgili qazaq jazýshylary men qoǵam qairatkerleriniń – Birjan saldyń 185 jyldyǵy, Abaidyń 175 jyldyǵy, Beiimbet Mailin, Sáken Seifýllin, Iliias Esenberlinniń 125 jyldyǵy, Sáken Júnisovtyń 85 jyldyǵy, sonymen qatar Fariza Ońǵarsynovanyń 80 jyldyǵy - mereitoilarynyń atalyp ótýi.
Buǵan qosa, ótkiziletin onkúndikte latyn grafikasyna kóshý jónindegi is-sharalarǵa erekshe kóńil bólinetin bolady.
