Kókshetaýda «Qazaq tilim – máńgi jasar bailyǵym» atty jastar forýmy óz máresine jetti.
Oblystyq Ishki saiasat basqarmasy habarlaǵandai, Qazaqstan halqy tilderi kúnine arnalǵan «Qazaq tilim - máńgi jasar bailyǵym» atty jastar forýmynda til úirenýdiń jáne ony jetildirýdiń, bolashaq urpaqtyń sanasyna engizýdiń, sondai-aq qazaq tiliniń bolashaǵy úshin jaýapkershilikti qalyptastyrýdyń ózekti máseleleri talqylandy.
Forýmǵa Kókshetaý qalasynyń joǵary oqý oryndarynyń, kolledjderiniń stýdentteri jáne óńirdiń belsendi jastary qatysyp, memlekettik tildi meńgerýdiń mańyzdylyǵy týraly pikirlerimen bólisti.
Oblystyq ishki saiasat basqarmasy basshysynyń orynbasary Sabyrhan Kenjebaev búgingi tańda memlekettik tildi damytý máselesi qoǵamdyq jáne saiasi basymdyqtardyń birine ainalǵanyn atap ótti.
«Til – memlkettiliktiń, óskeleń urpaqtyń laiyqty damýynyń jáne búkil ulttyń jarqyn bolashaǵynyń kepili», - dep atap ótti Sabyrhan Kenjebaev.
«Jas Ulan» biryńǵai balalar men jasóspirimder uiymy» qoǵamdyq birlestiginiń tóraiymy Mánsiia Esekeeva elimizde úsh tildilik konteksinde memlekettik tildi damytý oiyn bólisti.
«Rýhani jańǵyrý» jobalyq keńsesiniń basshysy Qairat Seitqazinniń, Shoqan Ýálihanov atyndaǵy Kókshetaý memlekettik ýniversitetiniń stýdenti Botagóz Ábsadyq jáne Abai Myrzahmetov atyndaǵy Kókshetaý ýniversitetiniń stýdenti Milana Piraevanyń sóz sóileýiniń negizgi mazmuny - búgingi ýaqytta elimizde memlekettik tildi damytý úshin barlyq jaǵdai jasalǵandyǵy jaiynda boldy. Al, M.Ǵabdýllin atyndaǵy murajai qyzmetkeri Úsen Tabysbek óleń oqyp berdi.
Jastardyń basty mindeti – tildi otbasynan bastap nasihattaý. Shara kontserttik baǵdarlamaǵa ulasty.
