Elorda mańyndaǵy Qajymuqan aýylynyń turǵyny qarǵa batqan kiikti qutqaryp, tabiǵi mekenine jiberdi, dep habarlaidy "Ult aqparat".
«Kúni keshe bizdiń inspektorlar qutqarylǵan aqbókendi bostandyqqa jiberdi. 14 aqpanynda Qajymuqan aýylynyń turǵyny Mádi Bektasovtan «102» qyzmetine qońyraý kelip túsken. Mádi myrza Nur-Sultan - Astrahan tas joly boiynda jabaiy aqbókenniń (kiik) qalyń qarǵa batyp qalǵanyn habarlaǵan», - dep jazyldy Orman sharýashylyǵy jáne janýarlar dúniesi komitetiniń Facebook paraqshasynda.
Sol kúni Aqmola oblystyq orman sharýashylyǵy jáne janýarlar dúniesi aýmaqtyq inspektsiia inspektorlary, Tselinograd aýdany politsiia bóliminiń tabiǵatty qorǵaý inspektory, RMQK ÓB «Ohotzooprom» inspektorlary birlesip aqbókendi qutqarý operatsiiasyn bastap ketken.
«Mádi myrza qarǵa batqan kiikti úiine alyp kelgen eken. Inspektorlar aqbókendi Tselinograd aýdany Maksimovka aýyldyq okrýginde ornalasqan «Tselinograd» ańshylyq sharýashylyǵy aýmaǵyna, olardyń tabiǵi mekeninen jibergen. Mamandardyń paiymyna súiensek, aqbókenniń jaǵdaiy jaqsy, jaraqat baiqalmaǵan», - deidi komitet.
Buǵan deiin Ekologiia ministrligi kiikterge qamqorlyq tanytýǵa shaqyrǵan edi.
«Sebebi sońǵy ýaqytta Qaraǵandy jáne Aqmola oblystarynyń eldi mekenderi men avtomobil joldarynyń mańynda aqbóken jii baiqala bastady. Olardyń ishinde álsirep qalǵan múiizdi kiik (erkek) kóp. Bul 2020 jyldyń jeltoqsan aiynda ótken kúiek kezeńiniń saldary. Budan bólek qalyń jaýǵan qar men kúnniń kúrt sýytyp, aýa temperatýrasynyń sońǵy 5-6 kúnde - 40 gradýsqa deiin tómendeýi de aqbókenniń jaǵdaiyna áserin tigizip jatyr. Atalǵan faktorlar kiikterdiń tirshiligin, azyqtandyrylýyn qiyndatyp, ómirine qaýip tóndirip jatyr. Jyl basynan beri 14 kiik ólimi tirkeldi», delingen habarlamada.
Qazaqstanda kiikterdiń Oral, Betpaqdala jáne Ústirt popýliatsiiasy mekendeidi. 2019 jylǵy esep boiynsha kiik sany 334 myńǵa jetti. 2020 jyldyń kókteminde engizilgen shekteýge bailanysty esep júrgizilgen joq. Alaida 2020 jylǵy kiik tóliniń kóp bolǵanyn eskere otyryp, qazir olardyń sany 450 myńnan asty dep boljanady.
