Aqmola oblysynda elektrmen jabdyqtaý júiesin qaita qurý kezinde 1,3 mlrd teńgeden astam qarajat urlandy. Ony bas merdiger, qosalqy merdiger, tehnikalyq qadaǵalaý jáne Tselinograd aýdanynyń laýazymdy tulǵalary Qyzylsýat aýylynda elektrmen jabdyqtaý júiesin qaita qurý kezinde jymqyrǵan.
Bul týraly Aqmola oblysy boiynsha Ekonomikalyq tergeý departamentiniń basshysy Nurábi Tóleýtai brifingte málim etti, dep habarlaidy QazAqparat.
Departament basshysynyń aitýynsha, 2021 jyly qylmystyq isterdiń aiaqtalýy 65,22 paiyzdy qurady, bul aldyńǵy jylmen salystyrǵanda kóp.
«Qyzylsýat aýylynda elektrmen jabdyqtaý júiesin qaita qurý kezinde 1,3 mlrd teńgeden astam somaǵa biýdjet qarajatyn urlaý faktisi boiynsha (bas merdiger, qosalqy merdiger, tehnikalyq qadaǵalaý jáne tapsyrys berýshiniń laýazymdy tulǵalary) «RemStroiServis-PV» JShS basshylary men Tselinograd aýdany ákimdiginiń laýazymdy tulǵalaryna qatysty qylmystyq is sotqa joldandy», - dedi Nurábi Tóleýtai.
Sonymen birge, ol Aqmola oblysy TJD basqarma basshysyna qatysty zańsyz oiyn biznesin uiymdastyrý faktisi boiynsha laýazymdy tulǵalardyń qatysýymen qylmystyq is sotqa joldanǵanyn atap ótti.
Brifingte aitylǵandai, memlekettik baǵdarlamalardy júzege asyrý, elektr energiiasymen jabdyqtaý, azyq-túlik jáne dári-dámekpen qamtamasyz etý, qarjy piramidasyn uiymdastyrýǵa qatysty birqatar qylmystyq ister qolǵa alynǵan.
«Tárkilengen múlikti eskere otyryp, aiaqtalǵan qylmystyq ister boiynsha ótelgen zalal somasy 1,6 mlrd teńgeni qurady», - dep túiindedi Nurábi Tóleýtai.
