Kókshetaýda Ábý Nasyr ál-Farabidiń 1150 jyldyǵyna arnalǵan «Ál-Farabi jáne onyń rýhani murasy» atty ǵylymi-tájiribelik konferentsiia ótti, dep habarlaidy "Ult aqparat".
Maǵjan Jumabaev atyndaǵy Aqmola oblystyq ámbebap ǵylymi kitaphasynda uiymdastyrylyǵan sharada aimaq basshysy Ermek Marjyqpaev Ál-Farabidiń 1150 jyldyǵy halyqaralyq deńgeide UNESCO aiasynda atalyp ótiletindigine toqtala kele, oblys aýmaǵynda jyl boiyna 500-den astam is-shara ótkizý josparlanyp otyrǵandyǵyn jetkizdi.
«Jalpy, biyl oblysymyzda ál-Farabi babamyzdyń mereitoiyna orai ár túrli formatta is-sharalar ótkizý josparlanǵan. Sonyń biri - uly oishyl, ǵulama Ábý Nasyr ál-Farabidiń eńbekterimen tereńirek oqyrman qaýymdy tanystyrý maqsatynda búgin uiymdastyrylyp otyrǵan ǵylymi-praktikalyq konferentsiia. Budan bólek, maýsym aiynda Otyrar memlekettik arheologiialyq mýzei-qoryǵynyń «Farab-Otyrar órkenieti» arheologiialyq kórmesi uiymdastyrylady. Sondai-aq, jyl boiy mádeniet, bilim salalarynda túrkitildes elder Túrkiia, Ózbekstan Respýblikalarynyń kitaphanalarymen onlain túrde telekópir júrgiziledi, ǵylymi-praktikalyq konferentsiialar seriiasy, mýzei sabaqtary jáne lektsiialar, dóńgelek ústelder, barlyq sanattaǵy aýditoriiany tartý maqsatynda aqparattyq kórmeler uiymdastyrylady», - dedi aimaq basshysy Ermek Marjyqpaev.
Sonymen qatar, konferentsiiada Túrkiianyń Ankara qalasyndaǵy Haji Bairam Veli ýniversitetiniń professory Konýralp Erjilasýn bei, Ál-Farabi atyndaǵy Qazaq ulttyq ýniversitetindegi ál-Farabi ǵylymi zertteý ortalyǵynyń ǵylymi keńesshisi, filosofiia ǵylymdarynyń doktory Jaqypbek Altaev, L.Gýmilev atyndaǵy EUÝ filosofiia ǵylymdarynyń doktory, professor, ǵalym Ǵarifolla Esim, filosof, teolog, Qoja Ahmet Iassaýi atyndaǵy Túrkistan memlekettik ýniversitetiniń arab tiliniń oqytýshysy Dosai Kenjetai, L.Gýmilev atyndaǵy EUÝ shyǵystaný kafedrasynyń professory, filologiia ǵylymdarynyń kandidaty Samal Tóleýbaeva, Ál-Farabi atyndaǵy QUÝ tarih ǵylymdarynyń kandidaty, professor Gúlnar Muqanova jáne Sh,Ýálihanov atyndaǵy Kókshetaý memlekettik ýniversitetiniń ǵalymdary men tarihshylarynyń Ál-Farabi jáne onyń rýhani murasy týraly taqyryptarda baiandamalary tyńdaldy.
