Aqmola oblysynda uly Abaidyń 175 jyldyǵyn merekeleý sheńberinde onlain formatta túrli sharalar ótkizilip jatyr. Sonyń biri – Aqkól aýdandyq kitaphanasynda Abaidyń ádebi ortalyǵy ashyldy, dep habarlaidy "Ult aqparat".
Ortalyqta halqymyzdyń uly aqyny, oishyly Abaidyń ómiri men shyǵarmashylyq álemine saiahat jasaýǵa bolady. Ortalyqtyń ashylýyna aýdandyq biýdjetten qarjy bólingen.
«Memleket basshysy Qasym-Jomart Toqaev óziniń sózinde oqyrmandardyń saýatyn arttyrýǵa kóńil bólý kerktigin aitqan bolatyn. Bul rette, kitaphananyń mańyzy zor. Alaida, kóptegen kitaphanalar jańǵyrtýdy jáne tsifrlandyrýdy qajet etedi. Al bizdiń kitaphanada jańa formattaǵy zaldarda alańsyz otyryp, kitap oqýǵa bolady», - deidi aýdandyq kitaphana mamandary.
Aita keteiik, Aqkól aýdandyq kitaphanasyna 1990 jyly uly Abaidyń esimi berilgen. Búgingi tańda kitaphana qorynda 61000 ekzempliar kitap bar. Onyń ishinde 6780 memlekettik tilde. Kitaphana úsh bólimnen turady. «Rabis» júiesi kómegimen elektrondy katalog úshin bibliografiialyq jazba júrgiziledi. Abonement, eki oqyrman zaly jáne ádisteme zalynan turatyn qyzmet kórsetý bólimi jumys isteidi.
Budan bólek, aýdandyq kitaphanada 2007 jyldan bastap, Keńes odaǵynyń batyry, Halyq Qaharmany, QR Birinshi qorǵanys ministri, general maior Saǵadat Nurmaǵambetovtyń mýzeii bar.
2018 jyly kitaphanada «Rýhani jańǵyrý» aýdandyq keńsesi men kovorking ortalyq ashyldy.
Aqkól aýdanynda ashylyp otyrǵan Abaidyń ádebi ortalyǵy bul Aqmola oblysynda ashylyp otyrǵan úshinshi osyndai ortalyq.
