Aqmola oblysynda it talaǵan 8 jasar qyz bala túrli dene jaraqatymen aýrýhanaǵa júgindi, dep habarlaidy QazAqparat.
Oblystyq politsiia departamenti baspasóz qyzmetiniń málimetinshe, oqiǵa 21 sáýir kúni Zerendi aýdanynyń Shaǵalaly aýylynda bolǵan. Politsiia bólimine 33 jastaǵy áiel habarlasyp, shyǵys eýropalyq tuqymdy ittiń iesine shara qoldanýdy suraǵan.
«Áieldiń sózinshe, saǵat 19:30 shamasynda kórshiniń iti kóshede júrgen 8 jasar qyzyna shabýyldaǵan. Qyzdy it aýzynan ájesi aman alyp qalady. Basy men keýde tusynan jaraqattanǵan bala meditsinalyq mekemege jetkizilip, dárigerler kómek kórsetken soń úiine jiberildi», - dedi politsiianyń baspasóz qyzmeti.
Iesi ittiń bailaýly turǵanyn, alaida ózderi joqta shynjyrdan bosap ketkenin aitqan.
«Aýyl turǵynyna qatysty politsiia qyzmetkerleri 407-2-baptyń 1-bóliginiń 4-tarmaǵy (úi janýarlaryn ustaý jáne serýendetý erejelerin buzý) boiynsha ákimshilik hattama toltyrdy. Iesine 10 ailyq eseptik kórsetkish mólsherinde aiyppul salý qarastyrylyp otyr», - dep tolyqtyrdy baspasóz qyzmetindegiler.
