Foto ashyq derekkózden alyndy
Almaty qalalyq Tótenshe jaǵdailar deparatmenti bastyǵynyń mindetin oryndaýshy Erlan Álibekov "Aqkent" shaǵyn aýdanynda bolǵan órt kezinde qurylys kranyn paidalanýǵa qatysty túsinikteme berdi, dep habarlaidy Sputnik Qazaqstan.
Órt sóndirýshiler oqiǵa ornyna 6 minýttyń ishinde barǵan. Biraq ol kezde avtotsisternalar, iaǵni, sý tasityn mashinalar ǵana boldy. 20 minýttan keiin basqa qurylymdardyń kúshteri de kelip jetti. Turǵyndardyń kóbi joǵary qabatta turyp, kómek surady.
"Qutqarýshylar avtobaspaldaqtar jetkenshe qol baspaldaqtaryn jáne shabýyldaýshy baspaldaqtaryn barynsha paidalandy. Órt sóndirýshi kólikterdegi avtobaspaldaqtardyń kómegimen 25 adam qutqaryldy. Qutqarý operatsiiasyna qurylys krandary da tartyldy. Ony ózińiz de kórgen shyǵarsyz. Janynda qurylys alańy bar. Ol jerde eki qurylys krany jumys istegen. Arnaiy besigi de boldy. Krandardyń kómegimen 20 adam qutqaryldy", - dedi Álibekov búgingi brifingte.
Onyń aitýynsha, órt sóndirý tehnikasy úidiń ońtústik jaǵynan kire almady. Dál sol jaqtan adamdar balkonnan sekirgen. Sodan joldyń jiektastaryn qolmen buzýǵa týra keldi. Oǵan da ýaqyt ketti.
"Iá, keshe biz avtobaspaldaqty jaqyndata almadyq. Sebebi ońtústik jaqtan kirý múmkin bolmady. Negizi, 10 qabattan joǵary úilerge jan-jaqtan kirýge joldar bolýy kerek. Al kireberis pen joldyń arasy kem degende 8 metr bolýy kerek. Keshe joldyń jieginen 15-16 metr boldy. Ondaida baspaldaqtar jetpei qalady", - dep atap kórsetti Álibekov.
