Memleket basshysynyń tapsyrmasyna sáikes, Ishki ister ministrligi politsiia men halyq bailanysyna eleýli ózgerister ákeletin jańa jumys modeline kóshedi, dep habarlaidy "Ult aqparat" vedomstvonyń baspasóz qyzmetine silteme jasap.
Ministr Erlan Turǵymbaevtyń bastamasymen qolǵa alynǵan ai saiynǵy «Jol ústindegi qabyldaý» aktsiiasy aiasynda azamattar kóshelerde, alańdar men aýlalarda jáne saýda ortalyqtarynda politsiia bólimderi, ákimshilik jáne kóshi-qon qyzmeti basshylarynan kásibi keńes aldy.
«Jol ústindegi qabyldaý» aktsiiasynyń sáýirden qyrkúiekke deiingi alty kezeńi ishinde qala men aýyl turǵyndary meiilinshe kóp shoǵyrlanǵan aimaqtarda ornalasqan 5 myń mobildi politsiia beketterinde 120 myń azamattyń ótinishteri zerdelendi. Buǵan qosymsha, telefonnyń «qaýyrt jelisi» (2,5 myńnan astam) jáne áleýmettik jeliler arqyly ótinish qabyldandy.
«Bólimshe basshylary azamattardy aldyn ala jazylýsyz jáne biýrokratiiasyz «kabinetten tys» qabyldady. Al adamdar óz problemalaryn formaldy emes jaǵdaida jedel sheshýge múmkindik aldy. Bul, árine, politsiianyń «áriptestik» qarym-qatynasyn, sondai-aq halyqpen «keri bailanysyn» nyǵaitýǵa yqpal etti. Aktsiia maýsym aiynan bastap eki formatta: tikelei «Jol ústindegi qabyldaý» jáne kóppáterli úiler men turǵyn úi keshenderiniń aýlalarynda uiymdastyrylǵan «Aýlada qabyldaý» túrinde júrgizildi» delingen habarlamada.
Aktsiia barysynda barynsha ózekti bolǵan máseleler mynalar:
- Ákimshilik aiyppuldardy tóleý (22,4 myń ótinish)
- Jol qozǵalysyn uiymdastyrý (16,9 myń ótinish)
- Avtokólikti tirkeý (15,8 myń ótinish)
- Kóshi-qon qyzmeti (15 myń ótinish)
- Júrgizýshi kýálikterin berý (11,4 myń ótinish)
- Avtokólikterdi qaita jabdyqtaý (9,6 myń ótinish).
IIO basqa qyzmetteri jelisi boiynsha 17,2 myńnan astam suraq qoiyldy.
Sonymen qatar, turǵyndardan qoǵamdyq qaýipsizdik, jol qaýipsizdigi, kóshi-qon, tergeý jáne basqa salalardaǵy jumystardy jaqsartý boiynsha usynystar kelip tústi.
Buǵan qosa áleýmettik jeliler arqyly 25 myńǵa tarta suraqtar kelip tústi.
