QR Indýstriia jáne infraqurylymdyq damý ministrligi elimizdiń qurylys sektorynyń turalaýyna jol bermeý úshin qabyldanyp jatqan sharalar jaiynda túsinik berdi, dep habarlaidy "Ult aqparat".
«Nurly jer» memlekettik baǵdarlamasy aiasynda elimizde qurylys salasyn qoldaýǵa baǵyttalǵan birqatar naqty shara qarastyrylǵan. Onyń ishinde ákimdikterge muqtaj azamattardy turǵyn úimen qamtamasyz etý úshin jeke qurylys salýshylardan daiyn turǵyn úi satyp alý múmkindigi berildi. Osy maqsatta biyl 4 myńnan astam páter satyp alý úshin 35 mlrd teńge bólý josparlanǵan. Bul rette respýblikalyq biýdjetten qarajat shekteýler boiynsha bólinedi (1 sharshy metrge - 140-180 myń teńge). Ákimdikter turǵyn úilerdi satyp alý kezinde jergilikti biýdjetten qosa qarjylandyra alady», - delingen QR IIDM málimetinde.
Qazir elimizdiń qurylys sektorynda tótenshe jaǵdaidyń keri áserin jeńildetý jáne koronavirýstyq pandemiiaǵa bailanysty turalaýǵa jol bermeý maqsatynda memleket barynsha qajetti sharalar qabyldaýda.
1. QR Prezidenti janyndaǵy tótenshe jaǵdai rejimin qamtamasyz etý jónindegi memlekettik komissiianyń 2020 jylǵy 13 sáýirdegi sheshimimen qyzmetkerlerdiń jumys oryndarynda qashyqtyqty saqtai otyryp, talap etiletin sanitarlyq-epidemiologiialyq sharalar saqtalǵan jaǵdaida kásipkerlik sýbektileriniń jumysy kezeń-kezeńmen jandandyrylady.
2. Aǵymdaǵy jyldyń 20 sáýirinen bastap Nur-Sultan jáne Almaty qalalaryndaǵy ónerkásip jáne qurylys kásiporyndary, sondai-aq qyzmet kórsetý salasynyń belgili bir sektorlary, onyń ishinde qurylys kompaniialary, asfalt jáne beton zaýyttary, kólemi 2 myń sharshy metrden asatyn iri qurylys dúkenderi jumystaryn qaita jandandyrdy. Ózge óńirlerde de bul jumys jalǵasýda.
«Kásiporyndar men kásipkerlik sýbektileriniń tizbesin olardyń qyzmetkerleriniń naqty sanymen, jumys ýaqyty men jetkizý tásilderimen óńirlerdiń jedel shtabtary aiqyndaidy. Sonymen qatar, Memleket basshysy 27 sáýirde málimdegendei, dertke qatysty ahýal ýshyqpasa, tótenshe jaǵdai rejimi 11 mamyrda aiaqtalýy tiis. Salynyp jatqan obektilerdi tapsyrý merziminiń buzylýyna jol bermeý maqsatynda, ákimdikterge qurylys-montaj jumystaryn júrgizý kestesin qaita qaraý jáne karantindik sharalardy alyp tastaǵannan keiin, áleýmettik mańyzy bar obektilerdiń qurylys qarqynyn kúsheitý qajettigi týraly usynymdar joldandy», - dep atalyp ótken vedomstvo málimetinde.
