Foto: baigenews.kz
Byltyr el boiynsha óńirlerdi damytýǵa bólingen nysanaly transfertterdiń 204,8 mlrd teńgesi igerilmei qalǵan, dep habarlaidy QazAqparat agenttigi Finprom.kz portalyna silteme jasap.
Onyń dereginshe, ótken jyly qańtar-qarasha ailary aralyǵynda elimizdiń qalalary men oblys ákimdikterine 2,9 trln teńge nysanaly transfertter bólingen.
Bul rette búkil qarajattyń 92,5%-y ǵana igerildi. Qalǵan qarajat kólemi - 220,6 mlrd teńge.
Onyń ishinde 15,8 mlrd teńge biýdjet qarajatynan únemdelgen bolsa, 204,8 mlrd teńge igerilmei qalǵan.
Ol - qazaqstandyqtardyń áleýmettik jaǵdaiyn jaqsartýǵa arnalǵan qarjynyń edáýir bóligi.
El óńirleri arasynda nysanaly transfertterdi igerý boiynsha paiyzdyq kórsetkishte Qyzylorda jáne Qostanai oblystary kósh bastady.
Qyzylorda óńiri ótken jyly transfertterdiń 99,2%-yn, al Qostanai oblysy 99%-yn igergen.
Bul tizimde kóshbasshylar úshtigin Shymkent qalasy túiindep tur. Byltyr atalǵan shaharda nysanaly transferttiń jumsalýy 98,6 paiyzdy quraǵan.
Jalpy, elimizdiń 9 óńirinde bul kórsetkish 95%-dan asty.
Al 5 oblysta qarajatty igerý 90-95% aralyǵynda bolsa, 6 óńirde oryndalmaǵan nysanaly transfert mólsheri 90%-dan tómen.
Ótken jyly qarajatty eń az igergen - Astana qalasynyń ákimdigi. Elordadaǵy nysanaly transfertterdiń oryndalýy nebári 68%.
Iaǵni, byltyr Astana ákimdigi 879,4 mln teńge biýdjet qarajatyn únemdese, qalǵan 60,3 mlrd teńge transfert qarjysy igerilmegen.
Sondai-aq, tómen kórsetkishter eki oblysta baiqaldy. Olar – Mańǵystaý (transfertti igerý - 83,7%) jáne Batys Qazaqstan oblystary (transfertti igerý -84,2%).
