Jańa Ekologiia kodeksinde jergilikti atqarýshy organdardyń qorshaǵan orta máselelerindegi ókilettikteri kúsheiedi. Bul týraly QR Ekologiia, geologiia jáne tabiǵi resýrstar ministri Maǵzum Myrzaǵaliev aityp berdi, dep habarlaidy QazAqparat.
«Kóliktiń aýany lastaý máselesin sheshý úshin elektr qozǵaltqyshy bar kólik quraldaryn paidalanýdy ilgeriletý jumystar júrýde. Ol úshin biyl maýsym aiynda ýtilizatsiialyq alymǵa «nóldik» stavka engizdik. Sondai-aq, «Óndirýshiniń keńeitilgen jaýapkershiligi» operatorymen tiisti infraqurylymdy qurý maqsatynda elektr kólikterin zariadtaý stantsiialaryn damytý týraly pilottyq joba iske asyryla bastady. Nur-Sultan jáne Almaty qalalarynda júzden astam zariadtaý stantsiialary jumys isteidi», - dedi Maǵzum Myrzaǵaliev búgingi Úkimet otyrysynda.
Ministrdiń aitýynsha, biyl uzyndyǵy 3 myń shaqyrym iri qalaaralyq trassalarda 46 jańa elektr kólikterin zariadtaý stantsiiasyn ornatý josparlanǵan.
«Jańa Ekologiia kodeksinde jergilikti atqarýshy organdardyń qorshaǵan orta máselelerindegi ókilettikterin edáýir kúsheitý jáne keńeitý kózdelgen. Kodeks kúshine engen soń ákimdikter árbir 5 jyl saiyn qorshaǵan orta sapasynyń nysanaly kórsetkishterin jáne ony jaqsartý jónindegi sharalardy bekitýge tiis. Odan bólek, ákimdikterge aýa sapasy nasharlaǵan kezde kólik quraldarynyń kirýine shekteý engizý quzyreti berildi. Sondai-aq qolaisyz meteorologiialyq jaǵdailarda, mysaly, jelsiz jaǵdaida, ákimdikter lastaýshy kásiporyndardyń qyzmetine ýaqytsha shekteýler engize alady», - dep túsindirdi Myrzaǵaliev.
