"Sátpaev qalasynda "Qazaqmys" korporatsiiasynyń Ońtústik-Jezqazǵan kenishi jumysshylary korporatsiia basshylyǵymen arada týyndaǵan "eńbek daýyna" bailanysty kelissóz júrgizip jatyr" dep habarlady Qaraǵandy oblysynyń ákimdigi.
Resmi málimet boiynsha, qazir kenishte oblys ákimdigi, Sátpaev qalasy men "Qazaqmys" korporatsiiasynyń basshylyǵy jumysshylarmen kelissóz ótkizip jatyr.
Búgin budan erterek Azattyq derekkózi men jergilikti belsendiler Sátpaev qalasynda atalǵan kenishtiń 300-ge tarta jumysshysy 29 qarasha kúni túnde túsken aýysymnan soń shahtadan shyǵýdan bas tartqanyn habarlaǵan.
Jumysshylar 30 qarashanyń tańynda korporatsiia basshylyǵyna birneshe talap qoiyp, shahtadan shyqpai qoiǵan. Jumysshylar "Qazaqmys" basshylyǵynan jalaqyny ósirýdi, zeinetaqylaryn qaita esepteýdi, emdeý jáne saýyqtyrý mekemelerinde tegin emdeýdi, jumystaryn tekseretin mobildi topty joiýdy, ótemaqy tóleýdi jáne korporatsiia basshysy Edýard Ogaimen kezdestirýdi talap etken.
