Ákimderge partiia filialdarynda laýazymdy qyzmet ielenýge shekteý qoiýǵa qatysty tiisti zańdar qaralyp jatyr. Bul týraly Májilis tóraǵasy Erlan Qoshanov málim etti, dep habarlaidy QazAqparat.
Búgin palatanyń jalpy otyrysynan keiin tilshiler E. Qoshanovtan ákimderge partiia filialdarynda laýazym ielenýge zań júzinde tyiym salý máselesine qatysty suraq qoidy.
«Osy boiynsha Prezident jariialaǵan bolatyn. Jaqyn arada bul taqyryp boiynsha sheshimder qabyldanady dep oilaimyn. Naqty kúnin aita almaimyn, biraq tiisti zańdar qaralyp jatyr», - dedi Májilis tóraǵasy.
Budan buryn habarlanǵandai, 26 sáýir kúni partiia sezinde Prezident Qasym-Jomart Toqaev AMANAT partiiasynyń tóraǵasy retinde ókilettigin toqtatyp, partiiadan shyǵý jóninde sheshim qabyldaǵanyn jariialady.
Sonymen qatar biyl naýryz aiyndaǵy Joldaýynda Memleket basshysy ákimderge partiia filialdarynda da laýazym ielenýge zań júzinde tyiym salý kerek ekenin aitty.
«Dál sol siiaqty, Ortalyq sailaý komissiiasynyń, Esep komiteti men Konstitýtsiialyq keńestiń tóraǵalary jáne músheleri mindetti túrde partiiadan shyǵýy kerek degen normany da zańnamaǵa engizgen jón. Barlyq ókilettikti bir qolǵa shoǵyrlandyrǵan ortalyqtaǵy jaǵdai aimaqtarda da qaitalanatynyn kórip otyrmyz. Sol sebepti ákimder men olardyń orynbasarlaryna partiia filialdarynda da laýazym ielenýge zań júzinde tyiym salý kerek. Mundai sheshimder kóppoliýsti partiialyq júie qalyptastyrýǵa múmkindik beredi», - dedi Qasym-Jomart Toqaev.
