QR Úkimeti janyndaǵy Koronavirýs infektsiiasynyń taralýyna jol bermeý jónindegi vedomstvoaralyq komissiia sanitarlyq rejimdi kúsheitý máselelerin qarady, dep habarlaidy "Ult aqparat" primeminister.kz saityna silteme jasap.
QR Premer-Ministriniń orynbasary Eraly Toǵjanovtyń tóraǵalyǵymen ótken Koronavirýs infektsiiasynyń taralýyna jol bermeý jónindegi vedomstvoaralyq komissiianyń kezekti otyrysynda elimizdegi qazirgi epidemiologiialyq ahýal, halyqty jeke qorǵaný quraldarymen qamtamasyz etý, halyqaralyq áýe qatynastyryn kezeń-kezeńmen ashý jáne basqa da ózekti máseleler qaraldy.
QR Densaýlyq saqtaý vitse-ministri Liýdmila Biýrabekova óz baiandamasynda halyq arasynda sanitarlyq tártiptiń saqtalmaýynyń kesirinen elimizde koronavirýs juqtyrǵandar sany artyp kele jatqanyn atap ótti.
«Aýrý adammen bailanysta bolǵandardyń arasynda virýsty juqtyrǵandar sany artty, onyń ishinde bir otbasy músheleri arasynda syrqattaný jaǵdaiy kóp tirkelýde. Ótken eki aptada koronavirýsty juqtyrǵandardyń jartysyna jýyǵy ujymdarǵa qatysty bolyp otyr», — dedi ol.
Osyǵan orai, Premer-Ministrdiń orynbasary indetke shaldyǵý sany artyp otyrǵan óńirlerdiń ákimdikterine karantin sharalaryn kúsheitý máselelerin qarastyrýdy tapsyrdy.
Óńir ákimdikteri sanitarlyq-epidemiologiialyq talaptardyń saqtalýyn baqylaityn monitoringilik toptardyń jumysyn kúsheitýdi, talaptardy oryndamaǵan obektilerdiń qyzmetin anyqtalǵan kemshilikter joiylǵansha ýaqytsha toqtatý boiynsha naqty sharalar qabyldaýdy qolǵa alýy qajet.
Memlekettik organ basshylaryna ujymnyń 80% qashyqtan jumys isteý tártibine aýystyrý usynyldy.
Keńes qorytyndysy boiynsha Premer-Ministrdiń orynbasary E. Toǵjanov birneshe naqty tapsyrmalar berdi.
Aita keteiik, búginge deiin Qazaqstanda koronavirýs 13558 adamnan anyqtaldy. Onyń ishinde jazylyp shyqqandar sany - 8400, 67 naýqas qaitys boldy.
