QR Ishki ister ministrligi birneshe 100-ge jýyq eldi mekenniń ákimderine eskertý jasady, dep xabarlaidy QazAqparat tilshisi.
Vitse-ministr Iýrii Ilinniń aitýynsha, búginde respýblika boiynsha sý basý qaýpi bar 505 eldi meken anyqtaldy. Atalǵan mekender Almaty (75), Shyǵys Qazaqstan (76), Batys Qazaqstan (72), Aqmola (46), Aqtóbe (35), Qaraǵandy (33), Qyzylorda (31), Qostanai (52), Pavlodar (14) jáne Soltústik Qazaqstan (18) oblystarynda ornalasqan.
«Biz ol eldi mekenderdi aldyn ala anyqtaǵan bolatynbyz. Arnaiy jol kartasyna sáikes jergilikti atqarýshy organdar daiyndyq jumystaryn júrgizýge mindetti. Biraq keibir óńirlerde daiyndyq sharalary oidaǵydai atqarylmaidy. Máselen, Ishki ister ministrliginiń jergilikti qurylymdary eldi mekenderdiń 88 ákimine eskertý jazyp berdi. Ondai aýyldar Qaraǵandy, Aqmola, Almaty, Pavlodar, Shyǵys Qazaqstan, Soltústik Qazaqstan, Qostanai men Aqtóbe oblystarynda ornalasqan. Bunyń bári jergilikti ákimderdiń kóktemgi sý tasqynynyń aldyn alý sharalaryna nemquraily qarap otyrǵanyn kórsetedi», - dep atap krsetti Iu.Ilin.
Aita keteiik, búgin «Qazgidromet» sý tasqynyna qatysty boljamyn jariialady. Mekeme basshysy Marat Kynatovtyń aitýynsha, búginde birqatar oblystarda sý kólemi artyǵymen jinalyp qaldy. Atap aitqanda, Qaraǵandy oblysynda Nura men Keńgir ózenderinde, Aqmola oblysynda Esil men Shaǵalyda, Soltústik Qazaqsanda Esil ózeninde, Qostanai oblysynda Toǵyzaq pen Torǵaida, Aqtóbe oblysynda Qosistekte, sondai-aq, Batys Qazaqstanda Ýtva, Chija-2, Derqul men Shaǵan ózenderinde sýdyń normasy 120-170 paiyzǵa artyq bolyp tur. «Ásirese, Batys Qazaqstan erekshe baqylaýǵa alyndy. Ol jaqta sýdyń jinalý kólemi normadan eki esege artyq, al ótken eki jylmen salystyrǵanda eki-úsh esege kóp bolyp tur», - deidi M.Kynatov.
