Foto: Akorda.kz
Prezident Qasym-Jomart Toqaev elimizdiń áleýmettik-ekonomikalyq damý máseleleri jónindegi keńeitilgen keńeste qalalardyń infraqurylymy men jailylyǵyn synǵa alyp, olardy abattandyrýǵa barynsha nazar aýdarýǵa shaqyrdy, - dep habarlaidy "Ult aqparat" Aqordanyń baspasóz qyzmetine silteme jasap.
"Qalalarymyzdyń kórinisi nashar, moiyndaýymyz kerek. Oiyn alańdary jabdyqtalmaǵan, úilerdiń tozyǵy jetken. Biýdjetteri áldeqaida az bolsa da, sheteldegi, ásirese Shyǵys Eýropadaǵy, Balqandaǵy qalalar óte ádemi kórinedi.
Bul mýnitsipal biliktiń jumysy bolsa kerek, ekinshi jaǵynan, bul - qala turǵyndarynyń turǵylyqty jerine degen kózqarasy. Qala turǵyndary óz kósheleri men úilerine nemquraidy qaraidy degen másele týyndap tur. Al bul elimizdiń imidji men bedelin túsiredi. Aitpaqshy, mundai másele elordaǵa da qatysty", - dedi Memleket basshysy.
Toqaev elordanyń joǵary mártebesine qalanyń ortalyǵy ǵana emes, onyń shetki bóligi de sai bolýy keregin birneshe ret aitqanyn eske saldy.
"Moiyndaiyq, ázirge bizdiń qalalar óte nashar kórinedi. Munda barlyq deńgeidegi ákimder, máslihattar ókilderi otyr. Nazar aýdaryńyz.
Jaqynda teledidardan Semeidegi balalar alańy týraly siýjetti kórsetti. Bul alańdy paidalaný qaýipti. Ákimder óz qalalary men eldi mekenderinde jaiaý júrýi kerek. Bul elordaǵa da qatysty", - dedi Prezident.
