Memleket basshysy Qasym-Jomart Toqaev aýyl ákimderin sailaý máseleleri jóninde keńes ótkizdi, dep habarlaidy Aqorda.
Memleket basshysy oblystardyń jáne respýblikalyq mańyzy bar qalalardyń ákimderimen aýyl ákimderin sailaý máseleleri jóninde keńes ótkizdi. Jiynǵa Prezident Ákimshiligi men Úkimettiń basshylyq quramy da qatysty.
Prezident aldaǵy sailaý naýqanynyń mańyzdy ekenin atap ótti.
«Osy oqiǵany elimizdiń tarihyndaǵy aitýly beles dep aitýǵa bolady. Negizi, bul biz úshin strategiialyq máni airyqsha mindet. Azamattarymyz tuńǵysh ret jergilikti atqarýshy biliktiń basshysyn tikelei sailaý múmkindigine ie bolmaq. Biz buǵan birtindep, josparly túrde keldik», – dedi Memleket basshysy.
Qasym-Jomart Toqaev aýyl ákimderin tikelei sailaý týraly bastamany byltyrǵy Joldaýynda kótergenin eske saldy. Bir jylǵa jeter-jetpes ýaqyt ishinde bul jumys júzege asyryla bastady.
Memleket basshysy Qazaqstan halqynyń 40 paiyzdan astamy aýylda turatynyna toqtalyp, bul saiasi shara, eń aldymen, aýyl turǵyndarynyń múddesi úshin jasalyp jatqanyn jetkizdi.
«Aldaǵy sailaý biz júzege asyryp jatqan saiasi reformalarǵa tyń serpin beredi dep senemin. Sondai-aq turǵyndardy el basqarý jáne sheshim qabyldaý úderisine tartýǵa jol ashady», – dedi Qasym-Jomart Toqaev
Memleket basshysy partiialyq básekeni kúsheitý máselesine nazar aýdardy. Partiiadan úmitker usyný memlekettiń institýtsionaldyq tutastyǵyn bekemdei túsedi jáne saiasi úderistiń barynsha ashyq bolýyna septigin tigizedi.
Osy rette Qasym-Jomart Toqaev jergilikti atqarýshy biliktiń jaýapkershiligi joǵary bolýǵa tiis ekenine basa mán berdi.
«Ákimder – biliktiń árbir eldi mekendegi tikelei ókili. Jurt olardyń qyzmetine qarap búkil memlekettik basqarý júiesiniń tiimdiligin baǵalaidy. Sondyqtan tiimdi memleket jáne ádiletti qoǵam talaptaryna sai bolý úshin aldaǵy sailaýdy durys uiymdastyrý óte mańyzdy», – dedi Qasym-Jomart Toqaev.
Sonymen qatar Prezident óńir basshylaryna birqatar mindet júktedi.
Atap aitqanda Memleket basshysy elimizdegi sanitarlyq-epidemiologiialyq ahýaldyń áli de kúrdeli ekenine nazar aýdardy. Onyń aitýynsha, Qazaqstannyń jasyl aimaqta turǵanyna qaramastan, bosańsýǵa áli erte, koronavirýstyń úndistandyq túriniń bizdiń elimizde de bolýy yqtimal.
Osyǵan bailanysty Prezident sanitarlyq-epidemiologiialyq shekteýlerdiń jii buzylyp jatqanyn jáne halyqty vaktsinalaý qarqynynyń báseńsip qalǵanyn aitty.
«Ákimder azamattarǵa ekpe salý naýqanynan shettep qalǵan siiaqty. Áleýmettik nysandardyń, biznes kásiporyndardyń jáne jalpy eldiń ekonomikasy vaktsinalaýdyń sátti júrgizilýine tikelei bailanysty ekenin túsiný kerek. Qazir jappai vaktsinalaý naýqany ákimder jumysynyń eń mańyzdy mindetteriniń qatarynda bolýy qajet. Sizder barynsha belsendilik tanytyp, azamattardy vaktsinalaý naýqanyna ózderińiz jetekshilik etýlerińiz kerek», – dedi Prezident.
Memleket basshysy sybailas jemqorlyqqa qarsy aldyn alý jumystaryn kúsheitýge shaqyrdy. Prezidenttiń aitýynsha, byltyr ártúrli deńgeidegi 7 ákim men olardyń orynbasarlary, sondai-aq, 14 oblystyq basqarma basshysy men olardyń orynbasarlary qylmystyq jaýapkershilikke tartylǵan. Budan bólek 2020 jyldyń qańtarynan 2021 jyldyń naýryzyna deiingi aralyqta qaramaǵyndaǵy qyzmetkerleriniń jemqorlyqqa qatysy bolǵany úshin 20 saiasi qyzmetkerge qatysty shara qoldanyldy.
Qasym-Jomart Toqaev ákimderge óz aimaqtaryndaǵy sybailas jemqorlyqty boldyrmaý úshin júieli jumystar júrgizýdi tapsyrdy. Al jemqorlyqqa qarsy kúres qyzmeti ózderine júktelgen mindetke sergek qaraǵany jón.
«Buǵan deiin aitqanymdai, eger memlekettik qyzmetshi biýdjet qarjysyn jymqyrýdy nemese para alyp baiýdy kózdemei, sheshim qabyldaý kezinde qatelikke jol bergen bolsa, onda ol qylmystyq jaýapkershilikke tartylmaýy kerek. Áitpese, memlekettik apparattyń berekesin ketiremiz. Sybailas jemqorlyqqa sanaly túrde barǵan sheneýnik qylmystyq jaýapkershilikke tartylýy tiis», – dedi Prezident.
Memleket basshysy ótken jylytý maýsymy barysynda bolǵan oqys oqiǵalar, órt jáne tehnologiialyq apattar máselesine basa mán berdi. Prezident tótenshe jaǵdailardyń saldaryn jedel joiý jumystaryn qamtamasyz etý jóninde túbegeili sharalar qabyldaýdyń qajettigine nazar aýdardy.
Budan bólek Qasym-Jomart Toqaev qoǵamdyq múlikti búldirý, buzaqylyq jáne vandalizm siiaqty oqiǵalardyń jiilep ketkenine toqtaldy.
«Jýyrda elordada mas adam liftidegi monitordy syndyrǵany úshin oǵan 14 myń teńge ǵana aiyppul salynǵan. Bulai bolmaidy. Mundai is-áreket úshin keminde 15 táýlikke qamaý kerek nemese 1 jylǵa túzetý jumystaryna salý jóninde jaza kesý qajet. Mundai jaǵdailarǵa múldem tózbeý kerek. Jeńil jaza jaramaidy. Al is júzinde jazalamaý saldary quqyq buzýshylyq pen qylmystyń odan ári órshýine alyp keledi. Sondyqtan osy másele boiynsha zańnamany qatańdatý kerek», – dedi Prezident.
Memleket basshysy biyl dástúrli formatta ótetin jańa oqý jylyna daiyndyq jumystaryn qazirden bastap qolǵa alý qajet ekenin aitty. Onyń aitýynsha, kóptegen bilim ordalary bir jyldan astam ýaqyt tolyqqandy jumys istemedi. Bul rette, Qasym-Jomart Toqaev ýniversitetterdiń, mektepter men balabaqshalardyń infraqurylymdarynyń daiyndyǵyn, sonymen qatar oqytýshylar men tárbieshiler shtatynyń jasaqtalý deńgeiin tekserýdi tapsyrdy.
Prezident jiyn sońynda óńirlerdegi ahýal úshin ákimderdiń ózderi jaýap beretinin eske salyp, qoǵamdyq-saiasi turaqtylyqty jáne ornyqty damýdy qamtamasyz etý olardyń tikelei mindeti ekenin atap ótti.
