Túrkistan qalasynyń ákimi Rashid Aiýpov Facebook-taǵy paraqshasynda AQSh túsirgen "Eles top" (6 Underground) filminiń rejisseri Maikl Beiý men amerikalyq Netflix kompaniiasyna úndeý tastady. Ol filmdegi oidan qurastyrylǵan "Týrgistan" memleketin kórermender qazaqstandyq Túrkistan qalasymen shatystyryp alýy múmkin ekenin aityp, Túrkistannyń filmde aitylǵan Týrgistannan "múlde basqa qala ekenin" jetkizdi. Ol buǵan "kóz jetkizý úshin" rejisserdi 1500 jyldyq tarihy bar qalaǵa shaqyryp, rejisserden kórermenderdi adastyrmaýdy da suraǵan.
"Bizdiń oiymyzsha, bul filmdi kórgennen keiin álemde milliondaǵan adam oidan qurastyrylǵan Túrgistan filmi jaily oilanýy múmkin jáne eki ataý bir-birine uqsas bolǵandyqtan qalamyz jaily teris pikiri qalyptastyrýy yqtimal. Buǵan qosa, qazirdiń ózinde elde kóp adamdar film Túrkistan qalasy týraly dep aityp jatyr" dep jazdy ákim.
Jeltoqsan aiynda film shyqqannan keiin Túrkimenstannyń keibir qalalarynda "Amerikaǵa qarsy úgit-nasihat" júrgeni aitylǵan edi. Azattyqtyń Tájik qyzmetiniń habarlaýynsha, mektep pen mádeniet úilerine joǵary synyp oqýshylary men memlekettik qyzmetkerler shaqyrylyp, AQSh-tyń "Túrkimenstan jaýy" ekeni, "halyqtyń narazylyǵyn týdyrýdy kózdeitini" aitylǵan.
13 jeltoqsanda jaryq kórgen Netflix filminde qazirgi Túrkimenstandy eske salatyn detaldar bar. 150 million dollarǵa túsirilgen filmde AQSh milliarderi oidan shyǵarylǵan Týrgistan memleketinde demokratiia ornatyp, qatygez diktatordyń kózin joiǵysy keledi.
Film Túrkimenstanda tez taralyp, ony jabyq túrde kórsetken keibir salondarǵa aiyppul salynǵan. Túrkimenstanda Netflix saity men onyń qosymshasyn júktep alatyn Google Play jabylǵan.
