Foto: bloknot-moldova.ru
Ákesimen birge ańǵa shyqqan bala óz aiaǵyn atyp aldy. Bul týraly IIM Ákimshilik politsiia komiteti Qarý ainalymyn baqylaý jáne tabiǵatty qorǵaý basqarmasynyń bastyǵy Asylbek Ydyrysov aitty, dep habarlaidy QazAqparat.
«2 qyrkúiekten bastap respýblika aýmaǵynda kúzgi ańshylyq kezeńi bastaldy. Osyǵan bailanysty ańshylardy ań aýlaý jáne qarýdy qaýipsiz ustaý qaǵidalaryn saqtaýǵa shaqyramyz. Búgingi kúni ań aýlaý kezinde bundai faktiler ókinishke orai oryn alyp otyr. Mysaly, Soltústik Qazaqstan oblysynda ákesi balasymen ańǵa shyqqan. Ol balasyna qarý bergen. Balasy qarýdy ustaý yńǵaiyn bilmei óziniń aiaǵyn atyp alǵan», - dedi basqarma bastyǵy ministrliktiń baspasóz qyzmeti alańynda ótken brifingte.
Onyń atap ótýinshe, ýákiletti qoryqshy qyzmeti ań aýlaý kezeńinde baqylaýdy kúsheitý boiynsha birqatar is-shara qabyldap jatyr.
«Óz kezeginde ishki ister organdary tabiǵatty qorǵaý organdaryna reidttik is-sharalardy ótkizýge kómek kórsetedi», - dedi Asylbek Ydyrysov.
