Búgin QR Parlament Májilisinde brakonerlikpen kúres máselelerine arnalǵan «dóńgelek ústel» ótti. Sol jerde Májilis tóraǵasynyń orynbasary Vladimir Bojko akbókenderdiń jappai qyrylý oqiǵasyn eske aldy, dep habarlaidy QazAqparat tilshisi.
«Búgin mańyzdy bir másele kóterildi. Bizdiń ǵylymi-zertteý institýttarymyz qaida? Zoologiia institýty ne istep otyr? Biz áli kúnge deiin 200 myń aqbókenniń neden qyrylǵanyn taba almai otyrmyz. Men Úkimette jumys istegende bireý turady da, aqbókender pasterellezden qyrylyp qaldy deidi. Ekinshisi taǵy bir sebebin aitady. Biraq áli kúnge deiin naqty jaýap joq», - dedi V.Bojko.
Onyń aitýynsha, elimizdiń florasy men faýnasyna qaýip tóndirip otyrǵan veterinarlyq aýrýlardyń oshaqtaryn anyqtaý qajet. Onsyz aqbókender de, bekire de qyryla beredi.
«Kaspiide kókserke nege qyrylyp jatyr? Qazir Jaiyq jaqta eki sharýashylyqta bekire balyqtary qyrylyp qaldy. Ózende muzdyń astynda óli balyq qalqyp júr. Biraq bárimiz ún-túnsiz otyrmyz. Kádimgidei tynyshtyq. Tórt ai ótti. Biraq sebebin eshkim bilmeidi. Balyq kimniń kesirinen ýlandy? Endi ol jerde bekireniń kóbeietinine kúmánim bar», - dep atap kórsetti V.Bojko.
Aita keteiik, osydan tórt jyl buryn Qazaqstanda nebári úsh aptanyń ishinde 200 myńnan astam aqbóken qyryldy. Bas kezinde mamandar atalǵan oqiǵanyń sebebin taba almady. Sheteldik mamandar da kómekke shaqyryldy. Olardyń sózine qaraǵanda, aqbókenderdiń qyrylýyna Pasteurella multocida infektsiiasy sebep boldy.
Búginde álem boiynsha kiikterdiń basym bóligi Qazaqstan dalasynda qonystanǵan. Janýarlardyń atalǵan túrin atýǵa ruqsat joq. Alaida brakonerler aqbókenderdi atyp, múiiz saýdasynan paida tabady. Jergilikti jerde aqbókenderden kesip alǵan múiizdiń bir kelisi 150 myń teńgege satylady. Almatyda onyń baǵasy 400 myńǵa deiin barady. Al Qytaida múiizdiń bir kelisine 4 myń AQSh dollaryn beredi. Sebebi ol jaqta aqbókenderdiń múiizinen dástúrli meditsinada sanalýan dáriler jasaidy.
