Aqbóken jaily málimetter Tuiaqty janýarlardyń dúniejúzilik kóshi-qon atlasyna engiziledi, dep habarlaidy "Ult aqparat" Qazaqstan bioalýantúrlilikti saqtaý qaýymdastyǵyna silteme jasap.
«Tuiaqty janýarlardyń kóshi-qony jónindegi álemdik bastama (GIUM) sheńberinde halyqaralyq ǵylymi komanda ázirlegen Bonn konventsiiasynyń (CMS) seriktestigimen jasalǵan jabaiy tuiaqtylardyń kóshi-qon joldary týraly derekter dúniejúzilik atlasqa kiredi. Bul zertteý dástúrli kóshi-qon baǵyttarynyń bóliný qaýpi tónetin jabaiy tuiaqtylardyń, onyń ishinde aqbókenniń maýsymdyq qozǵalysynyń alǵashqy túbegeili kartasyn usynady», delingen habarlamada.
Sońǵy on jylda jabaiy tuiaqtylardyń kóship-qoný qarqyny tómendep kele jatyr. Olardyń ǵasyrlar boiy qalyptasqan kóshi-qon joldary adam qolymen jasalǵan kedergilerge, atap aitqanda kúrejoldar men kúrdeli jol airyqtary bólip, janýarlar úshin kóptegen qiynshylyq týǵyzdy.
Tabiǵat qorǵaýshylary astanadan eldiń batys aimaǵyna deiin ótetin 2 myń shaqyrym «Ortalyq-Batys» kólik dálizi aqbókenniń Betpaqdala popýliatsiiasynyń arealyn bólýi múmkin dep qaýiptenedi.
Spýtnik baqylaý derekteri kórsetkendei, aqbókender josparlanǵan súrleýimen únemi qonys aýdarady. Eger qazirgi tańda qabyldanǵan baǵyt boiynsha jol salynatyn bolsa, aqbókender azyq qory jetkiliksiz jerlerde qalýǵa májbúr bolady.
«Jabaiy tuiaqtylardyń qozǵalystaryn kartaǵa túsirý olardyń qonys aýdarýynyń tabiǵi joldaryn saqtaý úshin qandai áreketter qajet ekenin túsinýge kómektesedi. Sondyqtan, tuiaqty janýarlardyń kóship-qoný atlasyn qurastyrý, álemdegi bioártúrlilikti saqtaýdy jaqsartý jolyndaǵy jańa meje bolyp tabylady. Zertteýshiler janýarlardyń kóship-qonýyn kartaǵa túsirý jumystary álemniń kóptegen elderindegi injenerler men ókiletti organdarǵa iri kólik joldary men dálizderin salýǵa bailanysty jobalaryn qaita qarastyrýǵa kómektesedi dep úmittenedi», delingen habarlamada.
Atlasty jasaǵanda Qazaqstan bioalýantúrlilikti saqtaý qaýymdastyǵy qyzmetkerleri jinaǵan derekter de paidalynady.
Qaýymdasmtyq «Altyn dala» tabiǵatty qorǵaý bastamasy sheńberinde, on jyldan astam ýaqyt boiy ulttyq jáne sheteldik áriptesterdiń qoldaýymen, memlekettiń erekshe qorǵaýyna ie aqbókenniń Qazaqstandaǵy kóship-qoný joldaryn zertteý boiynsha aýqymdy jumystaryn júrgizip keledi.
