Túrkiia eliniń astanasy Ankara qalasynda Qazaqstan Jazýshylar odaǵy basqarma Tóraǵasynyń Birinshi orynbasary, "Daryn" memlekettik jastar syilyǵynyń iegeri, belgili aqyn Aqberen Elgezektiń túrik tilinde shyqqan "Fantasmagoria" atty jyr jinaǵynyń tusaýkeser rásimi ótti, dep habarlaidy "Ult aqparat".
Shara Túrksoi halyqaralyq uiymynyń shtab-páterinde uiymdastyryldy. Kitap avtorlyq quqyqtardy qorǵaityn ILESAM uiymynyń qarjylandyrýymen jaryq kórip otyr. Jinaqtaǵy óleńderdi túrik tiline jas aýdarmashy Balsan Mádi tárjimalaǵan.
Jiyn barysynda ILESAM qalamgerler assotsiatsiiasynyń múshesi Ilter Eshilai aqynnyń týyndylaryn jan-jaqty taldap, arnaiy baiandama jasady. Sondai-aq, Ázerbaijannyń talantty aqyny Haial Rza jyly lebizin bildirip, óz oiymen bólisti.
Osy keshte baýyrlas ázerbaijan-túrik avtorlarynyń “Otan jaily óleńder” atty antologiiasynyń da tusaýkeseri ótti.
"Aziia forýmy kezinde ILESAM-nyń basshysy Abaidan bastap 100 qazaq shaiyrynyń óleńderin túrik tiline aýdaryp, kitap qyp shyǵarýǵa ýáde bergen. Qazir bul antologiiany daiyndaý jumysy qarqyndy júrip jatyr. Táńiri buiyrsa, jinaq aldaǵy jylda jaryq kóredi. Sol kúnge Táńirim barshamyzdy aman-esen jetkizsin deimiz.
Bul kishkentai eńbegimiz de eki el arasyndaǵy rýhani bailanystarymyzdyń damýyna tamshydai bolsa paidasyn tigizse, osy ómirde beker júrgen joqpyz. Buiyrsa, Alaniiada “Murajai-Poeziia-Mádeniet” konferentsiiasyna qatysyp, qazaq ádebietiniń damýy týraly baiandama jasamaqpyn", - dep jazdy Aqberen Elgezek sharadan soń.
