Biz ózi bir halyq bop uiysyp, bas qosqan ultpyz ba, erkin de sanaly azamattar bas qosqan qoǵambyz ba, álde jaiylyp júrgen ala-qula tobyrmyz ba?! Álde osy territoriiada ýaqytsha ómir súrip júrgen bireýlermiz be?! Osyny uqpai-aq qoidym men.
Jurttyń bári jazyp jatyr, ózimniń de kózim jetti. Gigienalyq maskalardyń baǵasy ushyp tur, qolǵa jaǵatyn geldi jaqynda aýktsionǵa shyǵaratyn shyǵar, jemis pen kókónistiń, et pen ózge azyq-túliktiń quny aspandap ketken. “Bireýdiń qorasy órtenip jatyr eken, baryp qoiymnyń basyn úitip alaiyn” degenniń keri. Immýnitetti kótere qalaiyq dep qymyz alýǵa barsaq, keshe ǵana 500 teńge turǵan qymyzdy beti bezergen satýshymyz shimirikpesten 1000 teńge dep baqyraiyp tur! Kókem-aý, sút beretin bie men koronovirýstyń bir birine ne qatysy bar sonda?!
Ainalaiyndar-oý, mynandai jaǵdaida ózge el bolsa, bir birine kómektesip, septesip, qamqor bolyp jatady. Bizdiń nietke ne bolǵan?! Erteń, Qudai betin ári qylsyn, soǵys bola qalsa, bir birimizdi atyp, qaryq bop qalarmyz myna túrimizben. Keshe talai ultty baýyrymyzǵa basqan el edik qoi, baýyrmal, aǵaiynshyl-týysqanshyl halyq edik qoi. Qazir qandai kúige túskenbiz?! Aityp aitpai ne kerek, memlekettik organdar myna ushyp turǵan baǵalardy baqylaýǵa almasa, erteń dúkenge ashtan buratylyp baryp tursań da, eshkim miz baqpaidy-aý. Júrekterimiz qataiyp ketipti, sony aitaiyn sizderge!
Aqberen Elgezektiń feisbýktaǵy jazbasynan
