Foto: Kazinform
Qazaq poeziiasynda ózindik orny bar, «Daryn» memlekettik jastar syilyǵynyń iegeri, Qazaqstan Jazýshylar odaǵynyń múshesi, aqyn Aqberen Elgezektiń shyǵarmashylyǵymen ádebietsúier qaýym jaqsy tanys. Osyǵan deiin bes kitaby jaryq kórdi.z
«Men negizi táp-táýir aqyn edim, keiingi kezde jazýshy bolyp kettim» degen Aqberen Elgezek prozaǵa da bet burdy.
«Bolmaǵan balalyq shaq» atty povesi qazaq bestsellerine ainaldy desek, qatelespeimiz. Sebebi aqynnyń balalyq shaǵynan jadynda qalǵan estelikterin jańǵyrtqan atalmysh kitaptyń búginde otyz myńǵa jýyq danasy satylǵan.
«Jaqsy oqylǵan, oqyrman qaýym jyly qabyldaǵan kitap boldy» deidi aqyn.
Dál osy shyǵarmanyń jelisi boiynsha Almaty qalasyndaǵy Ǵabit Músirepov atyndaǵy teatr bastap, birneshe teatr spektakl qoiyp, qoiylym áli kúnge deiin anshlagpen ótip jatyr. Onymen qosa, Sháken Aimanov atyndaǵy «Qazaqfilm» ulttyq kinostýdiiasy biyl «Bolmaǵan balalyq shaq» atty film túsirýdi qolǵa aldy.
«Jazýshylyǵymnan aqyndyǵym kóbirek aitylsa eken» deitin Aqberen Elgezektiń:
«Seni eshkimge bermeimin, suramasyn,
Suramasyn janymnyń munarasyn», — deitin óleń joldaryn Muqaǵali Maqataevtiki dep oilaityndar da bar.
Aqyn talai ret óleńiniń avtory Muqaǵali Maqataev dep jazylyp, aitylyp júrgenin biletinin jáne oǵan ishtei qýanatynyn jasyrmady.
Kópshiliktiń kóńilinen shyǵyp, «hitke» ainalǵan «Súiikti etshi», «Sezim úshin» siiaqty ánderdiń mátinin de Aqberen Elgezek jazǵan.
Shyǵarmashylyq adamynyń janyn túsinip, jazýǵa jaǵdai jasaityn — jary, belgili jýrnalist Dina Elgezek ekenin aitqan aqyn-jazýshy Aqberen Elgezek qazir «Men dardaimyn» degen atpen jańa roman jazyp jatqanyn jáne taqyryp turǵysynan Bul roman qazaq ádebietinde jańalyq bolatynyn aitty.
Jańa romannyń oqyrmany kóp bolsyn degen tilek aitamyz.
