Eki-úsh kún ótpei-aq, bárimizdiń ómirimiz kúrt ózgerdi. Sanamyzǵa úrei, kóńilimizge alań kirdi. Qudai Taǵala bárimizdi panasyna alyp, adamzatty tezirek bul indetten qutqarsyn!
Osyndai qiyn jaǵdaida árqaisymyz jaǵdaidy baqylap, syrtqa shyqpai úide otyrmyz. Talap sondai. Oryndaý kerek. Al, endi tap osy jaǵdaida bizdiń ardaqty dárigerlerimizdiń, medbikeler men meiirgerlerimizdiń, jedel járdem júrgizýshilerdiń, aýrýhanalardyń qabyrǵasy men edenin jýyp, sát saiyn virýs juqtyryp alý qaýpin basynan keshirip júrgen sanitarlyq qyzmetkerlerdiń jaǵdaiy neshik deseńizshi! Olardyń kóńil-kúilerin kim oilap otyr?! Bul kisilerdiń de bala-shaǵasy, týǵan-týysy bar. Bul kisilerdiń de jeke ómiri bar. Al, olar myna jalmaýyzben júrgizilip jatqan soǵystyń ótinde, aýyryp jatqan ár azamatymyz úshin jan alysyp, jan berisip jatyr.
Árine, keiingi kezde bizdiń meditsina salasyna kóńilimiz tolmai júr. Kei dárigerlerimizdiń biliktiligine, salada qalyptasqan jemqorlyqqa t.b. dúniege narazymyz. Baiaǵy bir “aq halatty abzal jan” degen qasterli uǵymnyń quny da túsip ketken siiaqty. Biraq qazirgi jaǵdaida bizdiń dárigerlerge esh ońai emes. Kúndiz-túni aýa ótpeitin formaǵa qymtanyp, basyn qaterge tigip júrgen ár dárigerdiń ornyna ózińizdi qoiyp kórińizshi! Óte qiyn jaǵdai!
Úide jatyp ap, aq bopty, kók bopty dep jatý - kim-kimniń bolsyn qolynan keledi. Al, álgindei sát saiyn, saǵat saiyn, táýlik saiyn kirpik qaqpai siz ben bizdiń densaýlyǵymyz úshin aianbai eńbek etý - naǵyz qaharmandyq! Sol sebepten, bizdiń ardaqty da jankeshti dárigerlerimizge kishkene bolsyn qoldaý sóz aitqym kep otyr. Aq halatty abzal jandar! Sizderdiń dál qazirgi jaǵdaidaǵy eńbekterińiz eren, halyqqa jasap jatqan ár jaqsylyqtaryńyz úshin árqaisylaryńyzdy Táńirim jarylqasyn! Kóp rahmet sizderge! Adamzatty osy bir indetten qutqarý - áýeli Jaratqannyń ámiri bolsa, ekinshi ózderińizdiń qajyrly da ólsheýsiz eńbekterińizdiń arqasynda bolmaq!
Osy rette men Prezidentimiz Qasym-Jomart Kemelulynan koronovirýsty jeńgen kúnniń ertesinde Nur-Sultan qalasynda Dárigerge eńseli eskertkish qoiýdy tapsyrýyn suraimyn! Densaýlyq ministrligine, ár aýrýhana basshylaryna shydamdylyq pen qairat-qýat tileimin! Biz tek osyndai jaǵdaida ǵana emes, máńgi birge bolýymyz kerek!
Dárigerlerimiz osy jazbamdy oqyp, halyq olarmen birge ekenin bilsin, qoldap otyrǵanymyzdy sezsin, qairattana qyzmetin atqarsyn.
Aqberen Elgezektiń feisbýktaǵy jazbasynan
