Tanymal kinorejisser Aqan Sataev «Tomiris» kórkem filmi túsiriliminiń aiaqtalǵanyn jariia etti, dep habarlaidy QazAqparat tilshisi.
«Dostar, biz «Tomiris» filminiń túsirilimin aiaqtadyq. Osyndai tamasha oqiǵany túsirý - men úshin úlken abyroi. Sondai-aq, kórermenniń aldynda úlken jaýapkershilik bar ekenin de bilemin... Bizder - men jáne meniń komandam, barlyq akterler bar kúsh-jigerimizdi salyp, úlken mahabbatpen jumys istedik! Túsirilim tobyn, barlyq akterlerdi, kómektesip, qoldaý kórsetken jandardy quttyqtaimyn jáne alǵys aitamyn», - dep jazdy Aqan Sataev Feisbýktegi paraqshasynda.
Rejisser atap ótkendei, bul jobanyń orny erekshe.
«Ár film maǵan qymbat!», - dep túiindedi A.Sataev.
Saq patshaiymy jaiyndaǵy «Tomiris» aýqymdy tarihi jobasy 2017 jyldyń sáýirinde bastalǵan edi. Filmdi QR Mádeniet jáne sport ministrliginiń tapsyrysymen Sháken Aimanov atyndaǵy «Qazaqfilm» AQ «Sataifilm» kinokompaniiasy túsirdi. Bas prodiýser - Áliia Nazarbaeva («Anaǵa aparar jol»). Filmniń qoiýshy rejisseri - Aqan Sataev («Reketir», «Adasqan», «Likvidator», «Jaýjúrek myń bala», «Anaǵa aparar jol»).
Kartina bizdiń dáýirimizge deiingi VI ǵasyrdaǵy oqiǵalar jaiynda syr shertedi. Ol kezeńde saq taipalary uly dalany jaýlap alýǵa kelgen parsy patshasy II Kirge oisyrata toitarys beredi. Saq áskeriniń qolbasshysy, massagetterdiń patshaiymy Tumar (Tomiris) boldy.
«Bul shaiqas, menińshe, halyqtar arasyndaǵy eń surapyl soǵys boldy», - dep jazdy ejelgi grek tarihshysy Gerodot. Film stsenariiin ázirlegen kezde onyń eńbekteri de paidalanyldy.
