Asqar Aqaev "Qumtór" jobasyn iske asyrý kezinde jibergen qateleri úshin Qyrǵyzstan halqynan keshirim surady, - dep habarlaidy "Ult aqparat" Sputnik Qyrǵyzstan basylymyna silteme jasap.
Burynǵy prezidenttiń aitýynsha, 1992 jyly "Qumtór" boiynsha kelisimge qol qoiylǵan kúnnen bastap qyrǵyz tarapy ulttyq múddelerge nuqsan keltirip, kóp jeńildik jasaǵan.
"Men jibergen qatelikterim úshin shyn júrekten keshirim suraimyn. "Qumtór" jobasy boiynsha qyrǵyz halqynyń úmitin aqtamadym. Úkimet tarapynan tiisti baqylaýdyń joǵy kanadalyq investorlarǵa kenishti tolyq baqylaýǵa alýǵa múmkindik berdi. Bul olarǵa zor paida ákelgenimen, Qyrǵyzstan úshin mardymsyz dividendter men ekologiialyq problemalardyń jyldan jylǵa ósýine ákeldi", - dedi Aqaev.
Eske salaiyq, 2 tamyzda Qyrǵyzstannyń burynǵy prezidenti Asqar Aqaevtyń Bishkekke oralǵany belgili boldy. Ol osyǵan deiin "Qumtór" jobasyn iske asyrý kezinde sybailas jemqorlyqqa jol berdi degen kúdikpen izdeýde bolǵan. Ol birden UQK ǵimaratyna jetkizildi, onda onyń qatysýymen ken orny boiynsha qylmystyq is aiasynda qajetti tergeý áreketteri júrgizildi.
Aqaev jýrnalisterge bergen suhbatynda, óz erkimen "Qumtór" isi boiynsha kýálik berý úshin bir aptaǵa kelgenin aitty.
