Elordada Akademiialyq adaldyq ligasynyń jalpy jinalysy ótip, liga Keńesiniń tóraǵasy sailandy, dep habarlaidy "Ult aqparat".
Qaýymdastyqtyń quramyna elimizdiń 11 joǵary oqý orny kiredi.
Jiyn barysynda M.S. Nárikbaev atyndaǵy KAZGIýÝ Ýniversiteti Basqarma tóraǵasynyń orynbasary Erbolat Muhamedjan biraýyzdan Akademiialyq adaldyq ligasy Keńesiniń tóraǵasy bolyp sailandy.
Kezdesýde jańa basshy Liganyń damýyna qatysty kózqarasyn bildirdi: «Meniń oiymsha, Akademiialyq adaldyq ligasy tek akademiialyq sapasy joǵary jáne kez kelgen akademiialyq ádiletsizdikke jol bermeitin ýniversitettermen ǵana bailanysty bolýy kerek. Liga QR Bilim jáne ǵylym ministrliginiń sapasyz joǵary oqý oryndaryn jabý men suranysqa ie emes mamandyqtardyń litsenziiasyn qaitarý boiynsha qazirgi saiasatyn qoldaidy».
Keńes tóraǵasy joǵary bilim salasyndaǵy máselelerge qoǵamnyń nazaryn aýdarý úshin bar kúshin salyp, media salasyndaǵy kásibi tájiribesin barynsha paidalanatynyn aitty. Sondai-aq Akademiialyq adaldyq ligasyn joǵary bilim salasyndaǵy kez kelgen ózgeriske daiyn brend retinde qalyptastyratynyn málimdedi.
Osy ýaqytqa deiin Erbolat Muhamedjan «Atameken TV» arnasy bas prodiýseriniń orynbasary, QR Bilim jáne ǵylym ministriniń keńesshisi jáne QR BǴM «Aqparattyq-taldaý ortalyǵy» AQ-nyń basqarýshy direktory qyzmetterin atqarǵan.
Aita keteiik, Akademiialyq adaldyq ligasy – Qazaqstan Respýblikasy joǵary oqý oryndarynyń qaýymdastyǵy. Liganyń basty maqsaty – akademiialyq adaldyq qaǵidattaryn alǵa qoiý arqyly joǵary jáne joǵary oqý ornynan keiingi bilim sapasyn arttyrý. Qaýymdastyq 2018 jyly AQSh-tyń jekemenshik ýniversitetteri múshelik etetin tanymal «Liga Pliýsha - The Ivy League» úlgisi boiynsha qurylǵan bolatyn.
