Batys Qazaqtan oblysynda Abai kúni alǵash ret atalyp ótti, dep habarlaidy "Ult aqparat".
Mereke Oraldaǵy Abai alańyndaǵy aqyn eskertkishine gúl shoqtaryn qoiýmen bastaldy.
Oǵan qatysqan oblys ákimi Ǵali Esqalievtiń atap ótkenindei, Memleket basshysynyń tapsyrmasyna sáikes biyl Abai kúni elimizde alǵash ret mereke retinde toilanyp otyr. Shynynda da Abaidyń murasy halqymen birge jasai bermek. Uly aqynnyń sol kezde jazǵan óleńderi men qara sózderiniń ómirsheńdigi sondai, qazirgi zamandaǵy hal-ahýaldy tap basyp kórsetedi. Abai armandaǵan «tolyq adam» bolsa ǵana qazaq muratyna jetpek. Danyshpannyń ósiet sózderin umytpai, odan taǵylym ala bilý keiingilerge paryz bolyp qala bermek.
«Abai kúni barshaǵa ortaq ulttyq mereke bolýy tiis. Táýelsizdik alǵan kezden bastap Abai kúnin belgilep, osynshama ýaqyt boiy uly aqyndy oqytý kerek edi. Sonda urpaq tez eseier edi, aldyńǵy qatarly elder qataryna tez qosylýǵa talap qylar edi. Degenmen áli de kesh emes. Bul meiram – uly Abaidyń esimi ár júrekke jazylatyn kún. Aqyn jyrlaryn tebirene oqyp, ánderin áýelete salatyn kún. Abai dúniege kelgen osy kúndi qasterlei bilsek, eldigimiz de biiktep, óremiz de ósedi», - dedi ziialy qaýym atynan sóz alǵan aqyn, Memlekettik syilyqtyń laýreaty Aqushtap Baqtygereeva.
Biyl qaita jańartylǵan aqyn alańynda Abaidyń qara sózderi jazylǵan tastar ornatylǵan. Sonyń birindegi: «...Yqylaspen oqyp, uǵyp alyńyzdar. Kúlli adamzat balasyn qor qylatyn úsh nárse bar. Sonan qashpaq kerek: áýeli – nadandyq, ekinshisi – erinshektik, úshinshi – zalymdyq dep bilesiń...» degen Abai sózderi halqyn máńgi saqtandyryp turǵandai.
Shara barysynda aqynnyń óleńderi oqylyp, ánderi oryndalyp, «Abai oqýlary» onlain baiqaýynyń jeńimpaz-júldegerleri marapattaldy.
