Aq úi seisenbi kúni AQSh valiýta basqarmasynyń jetekshiligine Sáýle Omarovany taǵaiyndaýdy usynyp, senatqa usynys joldady, dep habarlaidy Azattyq.
Eger onyń kandidatýrasy maquldansa, ol AQSh-taǵy myńnan astam banktiń qyzmetin retteitin 3,5 myń qyzmetkeri bar basqarmaǵa jetekshilik etedi. Ol sonymen birge basqarmanyń 158 jyldyq tarihynda basshy qyzmetine taǵaiyndalǵan tuńǵysh áiel jáne alǵashqy aziat bolmaq.
55 jastaǵy Sáýle Omarovanyń AQSh valiýta basqarmasynyń jetekshisine bas úmitker ekeni tamyzdyń basynda-aq belgili bolǵan. Qyrkúiekte AQSh prezidenti Djo Baiden ony Qarjy ministrligi quramyndaǵy Valiýta basqarmasynyń jetekshisi qyzmetine usynýǵa nietti ekenin bildirgen kezde AQSh qoǵamynda qyzý talqy týǵan. Bankter men respýblikashyldar Omarovanyń ideialaryn tym radikal sanap, oǵan qatty qarsylyq tanytqan.
AQSh-ta valiýta basqarmasynyń jetekshiligine kandidatty prezident usynǵanmen, senat maquldaidy. Sáýle Omarova kandidatýrasy bekitilýi úshin ony senattaǵy demokrattar biraýyzdan qoldaýy tiis.
