Qazaqstandy "SANASY ALBINOSTAR" ózgertedi
Qazaqstanda erekshe oilaýǵa bolmaidy. Erekshe oilaý kóp jaǵdaida unai bermeidi. Ásirese bilikke. "Aq qarǵalardy" bilik uzaqqa ushyrmaidy. Óitkeni qoǵam tek qana qarapaiym qarǵalardan turǵanda basqarýǵa ikemdi hám yńǵaily. Al "aqtar" oǵan ózgeris engizýi múmkin basty qaýip. Sondyqtan aqtardy bilikten, qoǵamnan alystaý ustaý kerek degen jazylmaǵan zańdylyq bar. Jalpy adamzat erekshelerdi unata bermeidi ǵoi.
Mysaly, Qudai umyt qaldyrǵan Afrikada kil qaralar kún kóshede. Kil qaranyń arasynda biren-saran "aqtar" bar. Aq násildiler emes, albinostar. Tek qana túsi erekshe bolǵany úshin Afrikada albinostarǵa naǵyz ańshylyq uiymdastyrylady. Olardy óltirý - kúná emes. Halyqty solai sendirgen. Kerisinshe albinosty ajal qushtyrǵan jan tez baiyp ketedi-mis. Sol sebepti de qarapaiym qaralar "erekshe aqtardy" kóshede óltiredi, úiine shabýyl jasaidy, tipti kómilgen qabirin qazyp, súieginen tumar jasaidy. Albinostyń qany qasietti dep, qurbandyqqa shalady. Al aiaǵy men qolynan bailyq shaqyrady dep, syiynatyn quraldar qashaidy. Aqymaqtyq, nadandyq, jaýyzdyq. Biraq halyq soǵan shyn senedi. Erekshelerdi ereksheligi úshin qýdalaidy.
Qazaqstanda da osyǵan uqsas. Eshkimdi óltirip jatqan joq, biraq erekshe oilylardy unata bermeidi. Mysaly, KSRO qalyptastyryp ketken tarihqa jańa kózqaraspen qaraýdyń ornyna Reseidiń aitýymen jazylǵan tarih bar. Ony ózgertkisi kelgen "erekshe oilylardy" qoǵam synai bastaidy. Ǵasyrlar boiy qalyptasqan dástúrdiń ozyǵyn qaldyryp, tozyǵyn joiýǵa niettengen "dástúrdi reformalaý, toidy modernizatsiialaý" ideiasyn usynǵan erekshelerdi qoǵam men halyq jerden alyp jerge salady. Dinge, saltqa, dástúrge syn aityp, kemshiligin kórsetkisi kelgen erekshelerdi aiyptaidy. Ondai aiyptaýlar bilikke tiimdi de. Sebebi álemge ózgeristi "ereksheler" ákelgen, ár jetistiktiń artynda óz salasyndaǵy "AQ QARǴALAR" tur.
Demek, bilik olardan qorqady, sol sebepti de qoǵamnyń olardy aiyptaýyn qup kóredi. Otqa mai quiady. Dei-tura men bizdiń qoǵamdy "sanalyq turǵydan albinostar" ózgerterine senemin. Erekshe emester kóp, olar erekshe emes eski júieniń qala berýin qalaidy. Alaida ereksheler kóbeiýde. Sondyqtan men ózgeristerdi Kútemin... Úmittenemin...
Ashat Qasenǵalidiń feisbýktaǵy jazbasynan
