Qazaqstandyq Air Astana kompaniiasy ushaǵynyń Portýgaliiada apatty jaǵdaida qonýyna boljam boiynsha buǵan deiin jasalǵan josparly jóndeý jumystary sebep bolýy múmkin. Bul týraly kompaniia prezidenti Piter Foster qarashanyń 12-si kúni Almatyda ótkizgen baspasóz máslihatynda málimdedi. Qazir Portýgaliia biligi ushaqtyń apatty jaǵdaida qonýyna bailanysty tergeý bastady.
Air Astana kompaniiasynyń Embraer 190 ushaǵy 11 qarasha kúni Lissabonnyń aviatsiialyq-tehnikalyq ortalyǵynda jóndeýden ótken soń Almatyǵa ushyp shyǵyp, uzamai dabyl belgisin bergen. Ekipaj budan soń ushaqty Beja qalasyndaǵy áskeri áýejaiǵa qondyrýǵa májbúr bolǵan.
Kompaniia basshylyǵynyń sózinshe, áýelde priborlar ushaq áýede jantaiatyn kezde ony tepe-teńdikte ustaý qiyn ekenin kórsetken. Osynyń saldarynan ushaqty aýa-raiy qolaisyz kezde basqarý qiyn bolyp, ekipaj qonýǵa sheshim qabyldaǵan. Ushaqta úsh ushqysh pen úsh injener bolǵan.
Ushaq tergeý aiaqtalyp, tótenshe oqiǵa sebebi anyqtalyp, durystalǵansha Portýgaliiada bolmaq. Kompaniia Portýgaliiaǵa eki injeneri men eki ushqyshyn jibergen.
Kompaniia basshylyǵy 2013 jyly shyǵarylǵan bul ushaqty keleshekte budan ary paidalaný jospary baryn aitady. Ushaq buǵan deiin Ortalyq Aziia aýmaǵy men Reseimen shekaralas qalalarǵa jáne Kavkazǵa ushqan.
