Air Astana áýe kompaniiasynyń basshysy Piter Foster daǵdarysqa qarsy qandai sharalar júrgizilip jatqanyn aityp berdi, dep habarlaidy QazAqparat tilshisi.
«Samuryq-Qazyna» ulttyq ál-aýqat qoryn basqarý jónindegi keńes otyrysynda Nursultan Nazarbaev kompaniia basshysyna aldaǵy jumys jospar jóninde suraq qoidy.
«Sizdiń kompaniiańyz barlyq halyqaralyq qaǵidalar men talaptarǵa sai jumys istep jatyr. Bul bizdi qýantady. Ókinishke qarai, álemdegi qazirgi ahýal áýe tasymalyn, ásirese jolaýshylar tasymalyn azaitty. Bul jóninde sizdiń pikirińiz ben aldaǵy jumys josparyńyzdy bilgim keledi», - dedi Nursultan Nazarbaev.
«Ózińiz atap ótkendei, aviatsiialyq indýstriia buryn-sońdy bolmaǵan jaǵdaidy bastan keshýde. Barlyǵy kúrdeli jaǵdaida. Biraq, bizdiń jolymyz boldy, biz daǵdarysqa 14 ai tabysty júrgizilgen trendteýden keiin kelip otyrmyz. Óz qarjylyq aǵynymyzdy kidirtý jáne ustap turý múmkindigi boldy. Kúrdeli daǵdarystyq kezeńge qaramastan, jańa baǵyttar da ashylyp jatyr. Qazirgi jaǵdaida áýe júk tasymaly suranysqa ie jáne Air Astana osy baǵytqa bet burdy», - dedi Piter Foster.
P. Foster kompaniianyń bastapqyda tek qana jolaýshylar tasymaldaǵanyn, al qazir júk tasymaldaý máseleleriniń egjei-tegjeiin qarastyryp jatqanyn jetkizdi.
«Búginde bizde Qytaiǵa jáne Eýropa elderine baǵyttalǵan 32 charterimiz bar. Júkti de, jolaýshyny da tasymaldaýy úshin keibir Boing-767 ushaqtarymyzdy ózgertip jatyrmyz. Air Astana júk tasymaldary úshin bólek divizion ornatyp jatyrmyz. Jaqynda 2 Boing-767 júk tasymaldary úshin qaita qurastyrylady. Bul – bizdiń daǵdarysqa áreket etý sharalarymyz», - dedi Air Astana basshysy.
