Almaty oblysynyń Jambyl aýdandyq Mádeniet úiinde Qazaqstan Respýblikasy Prezidenti Ákimshiligi ishki saiasat bóliminiń meńgerýshisi Aida BALAEVA «Qyzyr qonǵan qut meken» atty kitabynyń tusaýkeseri ótti.
Tanymdyq sipatta jazylǵan eńbek Elbasynyń «Bolashaqqa baǵdar: rýhani jańǵyrý» baǵdarlamalyq maqalasyndaǵy «Týǵan jer» jobasy aiasynda jaryq kórip otyr. Osy rette, saltanatty sharany ashyp, júrgizip otyrǵan oblys ákiminiń orynbasary Jaqsylyq Omar da kitap avtorynyń tusaýkeserdi kindik qany tamǵan kieli mekende ótkizýdi jón sanaǵanyn atap ótti.
Jiynǵa qatysqan kópshilikke júrekjardy lebizin bildirgen Aida Balaeva kitaptyń qolǵa alynýyna týǵan topyraqqa degen perzenttik mahabbatynyń túrtki bolǵanyn aitty. Aqyny nóserlep jyr tókken, batyry baiandy jurt etken ólkeniń tarihyn zerdelep, kóńil tebirenisin aq qaǵazǵa túsirýi aldaǵy úlken eńbektiń bastamasy dep biletinin jetkizdi.
– Ideianyń ii qanyp, ábden pisýi Elbasynyń «Rýhani jańǵyrý» baǵdarlamasy júzege asyrylyp jatqan kezeńge sáikes keldi. Munyń da úlken simvoldyq máni bar dep bilemin. Elbasy aitqandai, árkim Týǵan jeriniń damýyna úles qosý arqyly, Týǵan eldiń órkendeýine eńbek etedi, – deidi Aida Balaeva.
Qyzyr qonǵan kieli mekenniń shejiresinen syr shertetin kitap týraly M. Áýezov atyndaǵy Ádebiet jáne óner institýtynyń direktory Ýálihan Qalijan, T. Júrgenov atyndaǵy Ulttyq óner akademiiasynyń professory, jazýshy Naǵashybek Qapalbekuly, filologiia ǵylymdarynyń doktory, professor Kenjehan Matyjanov, Qazaqstandyq salalyq bilim jáne ǵylym qyzmetkerleri kásipodaǵynyń tóraiymy Maira Amantaeva, Qazaqstan Jazýshylar odaǵynyń tóraǵasy, aqyn Ulyqbek Esdáýlet, aýdandyq «Atameken» gazetiniń direktor – bas redaktory Rátbek Sádýaqasuly pikir bildirip, joǵary baǵa berdi.
– Bul – balalarǵa arnalǵan kitap. Sondyqtan, barynsha qarapaiym tilmen baiandalǵan. Tarihi derekterdiń mazmuny ashylyp, túsinikti jazylǵan. Kitap kishkentai oqyrmandardyń boiyna týǵan jerine degen súiispenshilik darytýǵa az da bolsa úles qossa – meniń maqsatymnyń oryndalǵany. Ol oqýshylardyń týǵan jerin tereńirek zertteýge qulshynysyn da oiatar dep úmittenemin. Bolashaqta irgeli zertteýler jasalyp, kitaptaǵy málimetter ǵylymi turǵydan bai túserine senimdimin", - dep atap ótti Aida Ǵalymqyzy.
Otanshyldyqqa, patriotizmge úndeý maqsatyndaǵy kólemdi kitap balalardyń talǵamyna sai kózge tartymdy, kóńilge qonymdy sapaly basylǵan. Onda kieli jerler, tarihi oryndar, osy óńirden shyqqan ult tulǵalary, jer-sý attarynyń shyǵý tórkini, eń aiaǵy shejire, ańyz-áńgimelerge deiin oryn berilgen. Aýdannyń ótkenimen qatar búgininen de mol maǵlumat qamtylyp, árbir aýyldyq aimaq pen eldi mekenge jeke-jeke toqtalǵan. Sharada aqyn Nadejda Lýshnikova qalamger sińlisine arnap óleń oqydy.
Sahna tórinde jasalǵan tusaýkeser rásiminde Aida Balaeva jinaqtyń alǵashqy danasyn tarih páninen sabaq bergen súiikti ustazy Nurshagúl Abaevaǵa tapsyrdy. Kelgen jurtshylyqqa da kitabyn syilady. Kesh sońynda aýdandyq «Súiinbai sazy» folklorlyq-etnografiialyq ansambliniń ártisteri án-jyrdan shashý shashty.
Jerlesterimen emen-jarqyn júzdesken Aida Ǵalymqyzy týǵan aýyly Jambylǵa baryp, murajaidaǵy aqyn kesenesi men Nurǵisa Tilendiev eskertkishine gúl shoǵyn qoidy. Odan soń ózi bilim alǵan Jambyl orta mektebine kirgen avtor ustazdar men oqýshylarǵa kitabyn taratyp, interaktivti taqta syilady.
Qozybai QURMAN,
Almaty oblysy
Ideianyń ii qanyp, ábden pisýi Elbasynyń«Rýhani jańǵyrý» baǵdarlamasy júzege asyrylyp jatqan kezeńge sáikes keldi.
Munyń da úlken simvoldyq máni bar dep bilemin.
Elbasy aitqandai, árkim Týǵan jeriniń damýyna úles qosý arqyly, Týǵan eldiń órkendeýine eńbek etedi.
