QR Aqparat jáne qoǵamdyq damý ministri Aida Balaeva prezidenttik kadrlyq rezervke kirgen jastarmen Zoom tuǵyrnamasynda onlain rejimdegi kezdesýde memlekettik tapsyrysty qalyptastyrý barysynda azamattyq qoǵam institýttarymen talqylaý júrgiziletindigin aitty, dep habarlaidy QazAqparat.
B2C consulting group basqarýshy seriktesi, rezervshi Aleksandr Danilovtyń moderatorlyǵymen ótken kezdesýge elimizdiń barlyq derlik óńirinen prezidenttik kadrlyq rezervke kirgen jastar qatysty. Shara barysynda QR Aqparat jáne qoǵamdyq damý ministri úkimettik emes uiymdar usynatyn barlyq joba ministrliktiń negizgi seriktesi sanalatyn Azamattyq alians tarapynan saraptalatyndyǵyn atap ótti.
«Biz úshin halyqtyń aqparatqa qoljetimdiligin qamtamasyz etý mańyzdy mindet. Memlekettik qyzmette bul aqparat jii biýrokratiialyq tilde berilip, halyq belgili bir bastamany, baǵdarlamanyń túpki mánin jete túsinbei jatady. Sondyqtan aqparatty qarapaiym tilmen jetkizý óte mańyzdy. Biz qoldanbaly sipatqa ie memlekettik baǵdarlamalar portalyn qurdyq. Ony suraq-jaýap túrindegi YouTube qosymshasymen tolyqtyrdyq. Búgingi kúni halyqpen belsendi keri bailanysty ornatyp, olardyń únin estý, suranystaryna jaýap berý mańyzdy», - dedi ministr.
Onyń atap ótýinshe, úkimettiń emes uiymdar tarapynan usynylatyn jobalardyń barlyǵy múmkindiginshe áleýmettik baǵdarlanǵan bolýy qajet ári halyqtyń barlyq sanatyna kómektesý tiis.
«Biz bul jobalardy júzbe-júz talqylaýǵa jáne onyń júzege asyrylý tiimdiligin qadaǵalap otyrýǵa niettimiz. Sol kezde memlekettik qyzmetke ári jekelegen ministrlikterdiń atyna syn-pikirler az bolar edi», - dedi Aida Balaeva.
Onlain kezdesý barysynda QR Indýstriia jáne infraqurylymdyq damý ministrliginiń Jobalyq basqarý departamenti direktorynyń orynbasary Aziz Ysqaqov ministrden «rezervshilerden jasaqtalǵan bastamashyl toptyń Ashyq úkimet portalyn qaita iske jumysyna tartylýy múmkin be» dep suraǵan bolatyn.
«Ókiletti organ Tsifrlyq damý, innovatsiia jáne aeroǵarysh ónerkásibi ministrligi sóizderdiń kómekterińizdi qabyl alady. Sizderdiń qatysýlaryńyz úshin ara aǵaiyn bolýǵa daiynmyn. Men úshin Ashyq úkimet portalynyń jumys istegeni mańyzdy. Ony barynsha beiimdeý qajet, jańa qyzmetteri de bolýy múmkin», - dep jaýap berdi ministr.
Al Óskemen qalalyq máslihatynyń depýtaty Stanislav Kárimov memlekettik organdar tarapynan sheshimderdi halyqpen talqylaýda kemshilikter bar ekendigin aitty.
«Balamasyz sheshim degen túsinik bar. Memlekettik organdar halyqpen talqylamai jatyp sheshimderdi shuǵyl qabyldap jatady. Talqylaǵannyń ózinde mán-jaiyn aldyn ala talqylaý joq. Dialogty talqylaýda kemshilikter bar. Eger muny jolǵa qoisa, onda kóptegen problema sheshiler edi. Menińshe, úkimettik emes uiymdar jumysynyń nátijeliligi tómen. Olar memlekettik tapsyryspen joba jasaǵanymen jumystary kórinbeidi», - dedi Stanislav Kárimov.
Osy rette ministr onyń pikirine qoldaý kórsetti.
«Qazirgi ýaqytta biz siz aitqan sharalardyń barlyǵyn júzege asyrýǵa niettimiz. Sondyqtan «qoǵammen turaqty suhbattastyq mańyzdy» dep óte durys atap óttińiz», - dedi Aida Balaeva.
