QR Prezidentiniń kómekshisi – QR Prezidenti Ákimshiliginiń Ótinishterdi qaraýdy baqylaý bóliminiń meńgerýshisi Aida Balaeva men Bilim jáne ǵylym ministri Ashat Aimaǵambetov Aqmola oblysynyń Tselinograd aýdany Qajymuqan aýylyndaǵy №4 mektepke bardy, dep habarlaidy QazAqparat.
Buǵan deiin aýyl turǵyny, jýrnalist, qoǵam belsendisi Azamat Keńesuly Facebook-te 150 balaǵa arnalǵan mektepte 600 balanyń bilim alyp jatqanyn aityp, shaǵymdanǵan bolatyn.
«Mektep ishiniń qanshalyqty tar ekenin ózińiz osy tsifrlyq aiyrmashylyqtan baiqap otyrǵan shyǵarsyz. Jańa oqý jylynda bala sany taǵy da arta túspek. Birneshe júz bala onsyz da qala mektepterine qatynap oqidy. Mektep 9 synyptyq. 10, 11-ge kóshken balalarymyz taǵy qala jaǵalap júredi. Jaýyn-shashyn, qar, boran, daýyldy kúnderi balalaryn qalaǵa oqýǵa jibergen ata-analar jandaryn shúberekke túiip otyrady. Bul qashanǵy jalǵasa bermek?!», - dep jazdy ol.
Óz sózinde jýrnalist Prezidenttiń «úsh aýysymdyq» mektepterdi joiý týraly tapsyrma bergenin, aýyldaǵy jańa mektep qurylysynyń turalap qalǵanyn atap ótti.
«Qazir aýylda resmi 600-dei bala mektepke baryp júrgenine qaramastan memleket byltyr 300 oryndyq mektep qurylysyn bastady. Hosh! Joqtan jaqsy dep halyq oǵan da kóndi. Biraq, onyń ózi saǵyzsha sozylyp, qurylys jertóleniń tóńireginen ári asa almai júr. Bárine kináli - qarjylandyrý. Mektep qurylysy QR Úkimetinen (BǴM) qarjylandyrylǵandyqtan oblys ákimshiligi de qaýqarsyzdyq tanytyp otyr. Jospar boiynsha mektep biyl jeltoqsan aiynda paidalanýǵa berilýi tiis. Biraq, merdiger kompaniia qarjy tolyq jetpeidi dep asyǵar emes. Sondyqtan Sizden mektep qurylysyna qajet qarajatty biyl tolyq berýge yqpal etýińizdi suraimyz. Bizdiń balalardy osynaý qiyndyqtan dereý qutqarýǵa kómektesýińizdi suraimyz, ári talap etemiz! Eger bizdiń sózimizdiń shyn ekenine kúmándansańyz kúsh atasy - Qajymuqan aýylyndaǵy mekteptiń qazirgi jaǵdaiyn kózińizben kórýge shaqyramyz!», - dedi A. Keńesuly.
Óz jazbasynda jýrnalist Bilim jáne ǵylym ministri Ashat Aimaǵambetovty, onyń keńesshisi Erbolat Muhamedjandy, Aqmola oblysynyń ákimi Ermek Marjyqbaevty jáne QR Prezidentiniń kómekshisi Aida Balaevany belgiledi.
Kelesi kúni Aida Balaeva men Ashat Aimaǵambetov Qajymuqan aýylyna arnaiy baryp, jańa mektep qurylysyn tekserdi.
«Sózden iske! QR Prezidenttiń jańa kómekshisi Aida Balaeva halyqtyń aryz-shaǵymyn anda-mynda joldaýdy doǵaryp, máseleniń naqty sheshilýin qadaǵalaitynyn málimdep edi. Búgin Aida Ǵalymqyzy elimizdiń bas ustazyn ilestire Qajymuqan aýylyndaǵy mektep qurylysyna qatysty qalyptasqan ahýaldy kózben kórdi. Kórip qana qoimai, máselege núkte qoiyp ketti. Qurylysqa qajet qarajat biyl tolyq bólinetin boldy. Bul elimizde halyqpen keri bailanystyń bastalǵanyn ańǵartady», - dep jazdy Azamat Keńesuly paraqshasynda.
Óz sózinde aýyl turǵyny halyqtyń ótinishimen eki laýazymdy tulǵanyń aýylǵa arnaiy kelýiniń basqa shendiler úshin zor sabaq bolǵanyn atap ótti.
«Sóitip, kómekshi men ministr bir qadammen myń adamnyń taǵdyryn bir sátte sheship ketti. Bul – úlken ózgeristiń basy. Jáne Prezident kómekshisi azamattardyń aryz-shaǵym, ótinishterin usaq-úlken dep qaramai, barlyǵyna mán beretinin aityp otyr. Kerek dese barlyq aýyl-aimaqqa barýǵa daiyn. Qysqasy, bilik ókilderi de, úkimet te is júzinde jańa qoǵamǵa qadam basty. Biz de qalys qalmaiyq! El janashyrlary arta bersin!», - deidi A. Keńesuly.
Eske sala ketsek, Memleket basshysynyń Jarlyǵymen Aida Balaeva Qazaqstan Respýblikasy Prezidentiniń kómekshisi – Qazaqstan Respýblikasy Prezidenti Ákimshiliginiń Ótinishterdi qaraýdy baqylaý bóliminiń meńgerýshisi bolyp taǵaiyndaldy.
