QR Prezidenti Ákimshiligi ishki saiasat bóliminiń meńgerýshisi Aida Balaeva kópbalaly otbasylarǵa 21 myń teńge járdemaqy qalai tólenetindigin túsindirdi, dep habarlaidy "Ult aqparat" QazAqparat agenttigine silteme jasap.
«Búgin men úshin erekshe kún! «Nur Otan» partiiasynyń saiasi keńesine sailandym. Partiialastarymnyń joǵary senimin aqtaýǵa tyrysatyn bolamyn. Osy oraida partiia sezindegi Memleket basshysy baiandamasynyń negizgi tezisterin aitqym keledi. Memleket basshysy atap ótkendei, búgingi sezd - el damýynyń jańa kezeńiniń bastaýy. Is júzinde búgin jańa áleýmettik doktrina usynyldy desek te bolady. Onyń basty basymdyqtary - bul ómir sapasyn arttyrý jáne halyqtyń az qamtylǵan tobyna qoldaý kórsetý. Meni eń mańyzdy áleýmettik bastamalardyń osy jyldan-aq júzege asyryla bastaityndyǵy qýantty», - dep jazdy Aida Balaeva Feisbýktegi paraqshasynda.
Onyń atap ótýinshe, Memleket basshysynyń tapsyrmasyna sáikes, aǵymdaǵy jyldyń birinshi shildesinen biýdjet salasynyń eń tómen jalaqy alatyn qyzmetkerleriniń ailyǵy 30 paiyzǵa (Olar sanitar jumysshylar, meiirbikeler, tehnikalyq jumysshylar jáne t.b.); atqarýshy organdardyń azamattarmen tikelei jumys isteitin tómengi satydaǵy qyzmetkerleriniń jalaqysy ortasha eseppen 25 paiyzǵa kóteriletin bolady.
«Bul maqsattarǵa shamamen 980 mlrd teńge bólinedi. Ákimniń burynǵy orynbasary retinde bul tsifrlardyń tasasynda kóptegen adamnyń ál-aýqatyn jaqsartýǵa degen úmiti turǵandyǵyn bilemin. Memleket basshysy aitqandai, reformanyń nátijelerin búginnen-aq árbir qazaqstandyq otbasy sezinýi tiis. Degenmen, menińshe, eń bastysy balalarǵa arnalǵan tólemdi kóterý jónindegi sheshim. Kópshilik úshin tólem tártibi qalai aiqyndalatyndyǵy túsinikisiz. Túsindirýge tyrysyp kóreiin. Qazirgi ýaqytta ataýly áleýmettik kómek jan basyna shaqqandaǵy tabysy bekitilgen kedeishilik sheginen - 14,8 myń teńgeden nemese kúnkóris minimýmynyń 50 paiyzynan tómen azamattarǵa kórsetiledi. Memleket basshysynyń tapsyrmasyna sáikes, kedeishilik shegi kúnkóris minimýmynyń 70 paiyzyna deiin kóterildi jáne 20 800 teńgeni quraidy. Bul ataýly áleýmettik kómek alýshylardyń árbir balasyna 20 800 teńge aýdarylady degendi bildiredi. Búgingi kúni 4 jáne odan da kóp balany tárbielep otyrǵan otbasy kópbalaly sanalady. Eger kópbalaly otbasyda 4 bala bolsa, onda járdemaqynyń jalpy somasy 83 myń teńge bolady. Al eger anasy úide otyrsa, onda onyń ataýly áleýmettik kómegi qosylady. Mundai otbasynyń jalpy tabysy shamamen 103 myń teńge bolady», - dedi Aida Balaeva.
Sonymen qatar ol múgedek bala tárbielep otyrǵan ata-analarǵa, qamqorshylar men otbasylarǵa járdemaqy 30 paiyzǵa kóteriletindigin atap ótti.
«Az qamtylǵan otbasylarǵa arnalǵan arnaiy 40 myń jaldamaly páter qurylysyna qatysty bastama da qatty qýantty. Buǵan qosa, turǵynúiqurylysjinaq júiesi arqyly jyldyq 2-3 paiyzben turǵyn úi zaemderin berýdiń jeńildetilgen tetigi ázirlenetin bolady. Bul az qamtylǵan otbasylardy baspanamen qamtamasyz etýde problemasyn sheshýdegi mańyzdy qadam dep sanaimyn. Bul jumysqa ómir sapasynyń jańa standarttary jaldamaly baspana salý, zamanaýi jergilikti joldar jelisin damytý, gaz tartý, aýyz sýǵa qoljetimdilik syndy jańa standarttardy engize otyryp, barlyq óńir jumylady», - dedi ol.
Bólim basshysynyń atap ótýinshe, eger buryndary avtobandar men respýblikalyq mańyzy bar joldardyń qurylysyna nazar aýdarylsa, endgi ýaqytta oblysaralyq jáne aýdandyq deńgeidegi avtomobil joldarynyń jelisi qarqyndy damytylady. Bul oblysishilik kólik qatynasynyń deńgeiin jaqsartyp, azamattardyń kúndelikti saparlaryn jaily qylady.
«Qorytyndysynda bul óńirlerdiń ekonomikasyna da, damýyna da septigin tigizedi. Búgin aitylǵan barlyq bastamalar qazaqstandyqtardyń ál-aýqatynyń artýyna aitarlyqtai úles qosatyndyǵyna senimim mol. Bul rette partiia róli - halyqpen tiimdi ózara is-qimyldy qamtamasyz etý jáne Memleket basshysy júktegen barlyq mindetterdiń júzege asyrylýyn monitoringileý», - dedi Aida Balaeva.
